சென்னை உயர் நீதிமன்றத்தில், அரசு பிளீடர் அலுவலகத்தில், ஒரு அரசு பிளீடர்; 25 சிறப்பு பிளீடர்கள்; 35 கூடுதல் பிளீடர்கள்; 57 அரசு வழக்கறிஞர்கள் உள்ளனர்.

அரசு பிளீடருக்கு மாத கட்டணம் 50,000 ரூபாய்; சிறப்பு பிளீடருக்கு 30,000 ரூபாய்; கூடுதல் பிளீடருக்கு 25,000 ரூபாய்; அரசு வழக்கறிஞருக்கு 20,000 ரூபாய் என்ற வகையில் அரசு வழங்கியது.

இது தவிர்த்து, 'அலவன்ஸ்' என மாதம் 5,000 ரூபாய் வழங்கியது. இந்த கட்டண நடைமுறை, ஆறு ஆண்டுகளாக இருந்தது.

அட்வகேட் ஜெனரலாக பதவி வகித்த மூத்த வழக்கறிஞர் சண்முகசுந்தரம், தற்போதைய அட்வகேட் ஜெனரல் பி.எஸ்.ராமன், அரசு வழக்கறிஞர்களுக்கு வழங்கப்படும் கட்டணத்தை உயர்த்தும்படி, தமிழக அரசுக்கு பரிந்துரைத்தனர்.

இதை, தமிழக அரசு பரிசீலித்து, பரிந்துரைகளை ஏற்று, கட்டணத்தை அதிகரித்து உத்தரவு பிறப்பித்துள்ளது. இந்த மாதத்தில் இருந்து, கட்டண உயர்வு அமலுக்கு வந்துள்ளது.

அதன்படி, அட்வகேட் ஜெனரலுக்கு மாத கட்டணம் 2.25 லட்சம் ரூபாய்; கூடுதல் அட்வகேட் ஜெனரலுக்கு, மாதம் 2 லட்சம் ரூபாய் நிர்ணயிக்கப்பட்டுள்ளது.

சென்னையில் உள்ள அரசு பிளீடருக்கு 1.80 லட்சம் ரூபாய்; மதுரை கிளையில் உள்ள அரசு பிளீடருக்கு 1.50 லட்சம் ரூபாய், சிறப்பு பிளீடருக்கு, 90,000 ரூபாய்; கூடுதல் பிளீடருக்கு, 75,000 ரூபாய், அரசு வழக்கறிஞருக்கு 60,000 ரூபாய் என கட்டணம் நிர்ணயிக்கப்பட்டுள்ளது.

உயர் நீதிமன்றத்தில், தீர்ப்பாயங்களில் ஒரு வழக்கில் ஆஜராக, அட்வகேட் ஜெனரலுக்கு, 45,000 ரூபாய்; உச்ச நீதிமன்றத்தில் ஆஜராக, 60,000 ரூபாய் நிர்ணயிக்கப்பட்டுள்ளது.

உயர் நீதிமன்றம், தீர்ப்பாயத்தில் ஆஜராக, கூடுதல் அட்வகேட் ஜெனரலுக்கு, 30,000 ரூபாய்; உச்ச நீதிமன்றத்தில் ஆஜராக, 40,000 ரூபாய் நிர்ணயிக்கப்பட்டுள்ளது.

அரசு தலைமை குற்றவியல் வழக்கறிஞருக்கு, 1.80 லட்சம் ரூபாய்; கூடுதல் குற்றவியல் வழக்கறிஞருக்கு, 90,000 ரூபாய்; குற்றவியல் அரசு வழக்கறிஞருக்கு, 75,000 ரூபாய் என கட்டணம் நிர்ணயிக்கப்பட்டு உள்ளது.

மாத கட்டணம் தவிர்த்து, வழக்குகளில் ஆஜராவதற்கு என, தனித்தனியாக கட்டணங்களும் நிர்ணயிக்கப்பட்டுள்ளன.

சிறப்பு அலவன்ஸ் ஆக, மாதம், 15,000 ரூபாயும் அரசு வழக்கறிஞர்களுக்கு வழங்கப்படுகிறது. வாகன வசதி அளிக்கப்பட்டவர்களுக்கு, இந்த சிறப்பு அலவன்ஸ் பொருந்தாது.