திருச்சி கருமண்டபம், கோட்டை, தென்னூர் ஆகிய பகுதிகளில் உள்ள 4 சி.பி.எஸ்.இ., பள்ளிகளுக்கும், மெயின்கார்டு கேட் பகுதியில் இருக்கும் மகளிர் கல்லூரி ஒன்றுக்கும் இன்று அதிகாலையில் இமெயில் மூலம் வெடிகுண்டு மிரட்டல் வந்துள்ளது. இதுகுறித்து காவல்துறை, வெடிகுண்டு செயலிழப்பு நிபுணர்களுக்கு தகவல் தெரிவிக்கப்பட்டது.

இதையடுத்து, சம்பந்தப்பட்ட கல்வி நிலையங்களுக்கு வெடிகுண்டு நிபுணர்கள் அனுப்பி வைக்கப்பட்டனர். களத்தில் இறங்கிய அவர்கள், எங்கேனும் வெடிகுண்டு வைக்கப்பட்டனவா என தீவிர சோதனை நடத்தினர். சிறிதுநேர சோதனைக்கு பின்னர் வெடிகுண்டு மிரட்டல் புரளி என்பது தெரியவந்தது.

வெடிகுண்டு மிரட்டல் விடுக்கப்பட்ட 3 பள்ளிகள், ஒரு கல்லூரிக்கு இன்று விடுமுறை விடப்பட்டுள்ளது. கடந்த மாதம் இதேபோன்று திருச்சி மாநகரில் இ-மெயில், கடிதம் மூலம் 3 முறை வெடிகுண்டு மிரட்டல் வந்தது. இதுதொடர்பாக விசாரணை நடத்தி வரும் நிலையில், தற்போது மீண்டும் இதே பாணியில் வெடிகுண்டு மிரட்டல் விடுக்கப்பட்டு உள்ளது, குறிப்பிடத்தக்கது.