நடிகர் ரஜினி பிரச்னை தொடர்பாக விளக்கம் கொடுக்க இருந்த ஆதவ் அர்ஜுனாவை, விஜய் தடுத்ததாக தகவல் வெளியாகி உள்ளது.

தி.மு.க., அரசை கண்டித்து, கடந்த 12ம் தேதி தமிழகம் முழுதும் த.வெ.க., ஆர்ப்பாட்டம் நடத்தியது. சென்னையில் நடந்த ஆர்ப்பாட்டத்தில் பங்கேற்று பேசிய த.வெ.க., தேர்தல் பிரசார மேலாண்மை பொதுச்செயலர் ஆதவ், 'எம்.ஜி.ஆருக்கு பின், சிஸ்டத்தை மாற்ற வேண்டும் என வந்த நடிகர் ரஜினியை, அரசியலுக்கு வரவிடாமல் தி.மு.க., மிரட்டியது. இப்போது, ரெட் ஜெயன்ட் தயாரிப்பில் படம் நடிக்க போய் விட்டார். அரசியலுக்கு வரும் மன தைரியம் விஜய்க்கு மட்டும்தான் உள்ளது' என பேசி இருந்தார்.

இதையடுத்து, தமிழகத்தின் பல்வேறு அரசியல் கட்சித் தலைவர்களும், ஆதவ் அர்ஜுனாவை கண்டித்ததோடு, நடிகர் விஜய், அவர் மீது நடவடிக்கை எடுக்க வேண்டும் எனவும் வலியுறுத்தினர். ஆதவை கண்டித்து, ரஜினியும் நேற்று அறிக்கை வெளியிட்டிருந்தார்.

அதில், 'காலம் பேசாது. ஆனால், காத்திருந்து பதில் சொல்லும்' என அதில் சொல்லி இருந்தார். அதையடுத்து, இப்பிரச்னைக்கு விளக்கம் அளிக்க, ஆதவ் அர்ஜுனா விரும்பினார்.

சென்னை, பனையூரில் உள்ள த.வெ.க., அலுவலகத்தில் நேற்று மதியம் 1:30 மணிக்கு, செய்தியாளர்களை அவர் சந்திக்க இருந்தார். கடைசி நேரத்தில், அது ரத்து செய்யப்பட்டது.

இதுகுறித்து, த.வெ.க., வட்டாரம் கூறியதாவது: ஏற்கனவே, ரஜினி ரசிகர்களுக்கும் விஜய் ரசிகர்களுக்கும் இடையே, சமூக வலைதளங்களில் கடுமையான மோதல் நடக்கிறது. அதில் எண்ணெய் ஊற்றுவதுபோல், ஆதவ் பேசியதை, முதலில் விஜய் ரசித்தார். ஆனால், அரசியல் பிரச்னையாக மாறியதால், அதற்கு விளக்கம் கொடுக்க, ஆதவ் முன்வந்தார்.

'விளக்கம் கொடுக்கிறேன் என, எதையாவது பேசி, பிரச்னையை பெரிதாக்கி விடாதீர்கள். பிரஸ் மீட் வேண்டாம்' என, விஜயின் வியூக வகுப்பாளர் ஜான் ஆரோக்கியசாமி கூறியதை ஆதவ் கேட்கவில்லை. இத்தகவல் விஜய்க்கு சொல்லப்பட, அவரின் எச்சரிக்கையின்படி, ஆதவ் பிரஸ் மீட் ரத்தாகி உள்ளது. இவ்வாறு அந்த வட்டாரம் கூறியது.

இதற்கிடையில், ரஜினியின் திடீர் அறிக்கைக்குப் பின்னணியில் மத்திய உள்துறை அமைச்சர் அமித் ஷா இருப்பதாக ஒரு தரப்பும்; 'துணை முதல்வர் உதயநிதி துாண்டுதல் பேரிலேயே விஜயை ரஜினி சீண்டி இருக்கிறார்' என்று மற்றொரு தரப்பும், மாறி மாறி கருத்துகளை வைக்க, சமூக வலைதளங்களில் சூடாகச் சென்று கொண்டிருக்கிறது விவாதம்.