ஸ்டார்ஷிப்

அமெரிக்க விண்வெளி நிறுவனமான ஸ்பேஸ்எக்ஸ், செயற்கைக்கோள் ஏவும் செலவை குறைக்கும் முயற்சியாக ஸ்டார்ஷிப் ராக்கெட்டை தயாரித்துள்ளது. இந்த ராக்கெட் செயற்கைக்கோளை விண்ணில் ஏவிவிட்டு கடலில் விழாமல், மீண்டும் பூமிக்கும் திரும்பும் வகையில் வடிவமைக்கப்பட்டுள்ளது.

கடந்த 2023ல் இருந்து இந்த ஸ்டார்ஷிப் ராக்கெட்டை டெஸ்ட் பிளைட் என்ற பெயரில் வரிசையாக சோதனைக்கு உட்படுத்தி வருகின்றனர். அதில் நேற்று எட்டாவது ஸ்டார்ஷிப் சோதனை ராக்கெட், அமெரிக்காவின் டெக்சாஸ் மாகாணத்தில் உள்ள ஏவுதளத்தில் இருந்து விண்ணில் செலுத்தப்பட்டது.

ராக்கெட் புறப்பட்ட இரண்டரை நிமிடங்களில் அதில் உள்ள பூஸ்டர் எனப்படும் உந்துசக்தி சாதனம் வெற்றிகரமாக மீண்டும் ஏவுதள கோபுரத்திற்கு திரும்பியது.

இதற்கிடையில், ஸ்டார்ஷிப் விண்கலத்தின் இயந்திரங்கள் முழுமையாக மேலோக்கி செல்லும் முன்பாக இயக்கத்தை நிறுத்தின.

இதனால் விண்ணில் ஏவப்பட்ட 17 நிமிடங்களில், இரண்டாம் கட்ட இன்ஜின் பழுதடைந்து ராக்கெட் கட்டுப்பாட்டை இழந்து வளிமண்டலத்திற்குள் நுழைந்து டர்க்ஸ் மற்றும் கைகோஸ் தீவுகளின் மேல் வெடித்துச் சிதறியது. இதே இடத்தில்தான் கடந்த ஜனவரியில் ஏவப்பட்ட, ஸ்டார்ஷிப்பின் ஏழாவது ராக்கெட் வெடித்தது.

சேவை பாதிப்பு

இதுவரை ஏவப்பட்ட எட்டு ஸ்டார்ஷிப் ராக்கெட்டுகளில் நான்கு வெற்றியடைந்துள்ளன. நான்கு தோல்வியில் முடிவடைந்துள்ளன.

நேற்று முன்தினம் வானில் வெடித்துச் சிதறிய ஸ்டார்ஷிப் ராக்கெட்டின் பாகங்களால், மியாமி, போர்ட் லாடர்டேல், பாம் பீச் மற்றும் ஆர்லாண்டோ விமான நிலையங்களுக்குச் செல்லும் விமானங்கள் ஒன்றரை மணி நேரம் நிறுத்தப்பட்டன. அதன்பின் விமானப் போக்குவரத்து சீரடைந்தது.