அமெரிக்க அதிபர் டிரம்பின் தீவிர ஆதரவாளராக இருந்தவர் தொழிலதிபர் எலான் மஸ்க். இந்தாண்டு ஜனவரியில் டிரம்ப் அதிபராக பொறுப்பேற்றதும் எலான் மஸ்க்கை அரசின் செயல்திறன் துறையின் தலைவராக நியமித்தார். அரசின் தேவையற்ற செலவுகளை குறைப்பதே இத்துறையின் நோக்கம்.

இந்நிலையில், அதிபர் டிரம்ப் பெரிய அழகிய வரி என்ற மசோதாவை அறிமுகப்படுத்தினார். இதில் மக்களுக்கான வருமான வரி, தொழில் வரி குறைப்பு, மின்சார கார்களுக்கான சலுகை நீக்கம் போன்ற அம்சங்கள் இடம்பெற்றிருந்தன. அரசின் கடன் உச்சவரம்பை உயர்த்த அனுமதிக்கும் சட்டப்பிரிவும் இருந்தது.

இதற்கு எதிர்ப்பு தெரிவித்து, அரசின் செயல்திறன் துறை தலைவர் பதவியை எலான் மஸ்க் ராஜினாமா செய்தார்.

தற்போது இந்த மசோதா அமெரிக்க பார்லிமென்டில் நிறைவேறியது. அதிபர் டிரம்பும் நேற்று முன் தினம் ஒப்புதல் வழங்கினார்.

இதனால் தன் சவாலை நிறைவேற்ற புதிய கட்சி துவங்கி உள்ளார் எலான் மஸ்க். முன்னதாக இது குறித்து, சமூக வலைதளத்தில் மக்களிடம் அவர் கருத்து கேட்டார்.

இதைத் தொடர்ந்து அவர் வெளியிட்ட பதிவில், 'மூன்றில் இரண்டு பங்கினர் புதிய அரசியல் கட்சியை விரும்புகிறீர்கள். அது உங்களுக்கு நிச்சயம் கிடைக்கும்.

நம் நாட்டை வீண்செலவு மற்றும் ஊழல் மூலம் திவாலாக்கும் முயற்சியில் ஈடுபட்டுள்ளனர்.

உங்கள் சுதந்திரத்தை உங்களுக்குத் திரும்பக் கொடுக்க அமெரிக்கக் கட்சி உருவாக்கப்பட்டது' என, கூறியுள்ளார்.