அமெரிக்க அதிபர் டிரம்ப் உத்தரவின் படி, ஜனவரி 3ல், தென் அமெரிக்க நாடான வெனிசுலாவில் நுழைந்த அமெரிக்க ராணுவத்தினர், அந்நாட்டு அதிபர் நிக்கோலஸ் மதுரோவையும், அவரது மனைவி சிலியாவையும் கைது செய்தனர். போதைப்பொருள் பயங்கரவாதத்தை ஊக்குவித்த குற்றச்சாட்டுகளின் அடிப்படையில் இந்த சம்பவம் நடந்தது. தற்போது வெனிசுலா அதிபர் மதுரோ, அமெரிக்க சிறையில் அடைக்கப்பட்டுள்ளார்.

மதுரோ கைதுக்கு பின் வெனிசுலாவில், துணை அதிபராக இருந்த டெல்சி ரோட்ரிகஸ் இடைக்கால அதிபராக பொறுப்பேற்றார். இருப்பினும் வெனிசுலா நிர்வாகத்தை அதிபர் டிரம்ப் கட்டுப்படுத்துகிறார். கச்சா எண்ணெயை யாருக்கு விற்பனை செய்ய வேண்டும் என்பது உட்பட பல நிபந்தனைகள் விதித்துள்ளார். தற்போது வெனிசுலா தனது கட்டுப்பாட்டில் இருப்பதாக அதிபர் டிரம்ப் திட்டவட்டமாக தெரிவித்துள்ளார்.

அவர் சமூக வலைதளத்தில் வெளியிட்டுள்ள படத்துடன் பதிவு ஒன்றை வெளியிட்டு இருக்கிறார். அந்த பதிவில் ஆங்கிலத்தில், ''Acting President of Venezuela'' என குறிப்பிடப்பட்டு உள்ளது. நான் தான் வெனிசுலா அதிபர் என்று வெளிப்படையாக அறிவித்து இருப்பது, வெனிசுலா மக்கள் மத்தியில் கொந்தளிப்பை ஏற்படுத்தும் என்று எதிர்பார்க்கப்படுகிறது. அதுமட்டுமின்றி வெனிசுலாவின் அண்டை நாடுகள் டிரம்பின் இத்தகைய நடவடிக்கையை உன்னிப்பாக கவனித்து வருகின்றன.