ரஷ்யா-உக்ரைன் போருக்கு மத்தியில், கிறிஸ்துமஸ் விழா உரையில், ரஷ்ய அதிபர் புடின் அழிந்து போகட்டும் என உக்ரைன் அதிபர் ஜெலென்ஸ்கி தெரிவித்து உள்ளார்.

உக்ரைனில் நடந்த கிறிஸ்துமஸ் விழாவில் அந்நாட்டு அதிபர் ஜெலன்ஸ்கி பேசியதாவது: ரஷ்யா தொடர்ந்து தாக்குதல் நடத்தி வந்தாலும், உக்ரைன் மக்கள் பண்டிகை காலத்தில் நம்பிக்கையால் ஒன்றுபட்டுள்ளனர். ரஷ்யா மிக முக்கியமான இடங்களை ஆக்கிரமிக்கவும் அல்லது குண்டு வீசவோ முடியாது. இன்று, நாம் அனைவரும் ஒரே கனவைப் பகிர்ந்து கொள்கிறோம்.

அனைவருக்கும் ஒரு விருப்பத்தை பகிர்ந்து கொள்கிறேன். அவர் (அதிபர் புடின்) அழிந்து போகட்டும் என்று நாம் ஒவ்வொருவரும் நம்மை நாமே நினைத்துக் கொள்ளலாம். ஆனால் நாம் கடவுளிடம் ஒன்றைக் கேட்கிறோம். உக்ரைனில் அமைதி நிலவ வேண்டும். அதற்காக நாங்கள் போராடுகிறோம், அதற்கு ஜெபிக்கிறோம். முழு குடும்பமும் ஒரே இடத்தில் கூடும்போது அது மகிழ்ச்சி அளிக்கிறது. இவ்வாறு ஜெலன்ஸ்கி பேசினார்.

ரஷ்யாவின் தாக்குதலை நிறுத்த அமெரிக்கா முயற்சித்து வரும் நிலையில், அந்நாடு தயாரித்த 20 அம்ச திட்டம் கொண்ட அமைதி ஒப்பந்தத்தில் பெரும்பாலானவற்றை உக்ரைன் ஏற்றுக் கொண்டுள்ளது. அமெரிக்கா மற்றும் உக்ரைன் ஏற்றுக் கொண்ட நிலையில், அந்த ஒப்பந்தம் ரஷ்யாவுக்கு அனுப்பி வைக்கப்பட்டு உள்ளது. இந்த சூழலில் ரஷ்ய அதிபர் புடின் அழிந்து போகட்டும் என ஜெலன்ஸ்கி பேசியது போர் தொடருமா என்ற கேள்வியை எழுப்பி உள்ளது.