யார் இந்த கிரியாகோவ்? ஜான் கிரியாகோவ் அமெரிக்காவின் மத்திய புலனாய்வு அமைப்பான சி.ஐ.ஏ.,வின் முன்னாள் அதிகாரி. சி.ஐ.ஏ.,வில் 15 ஆண்டுகள் பணியாற்றியுள்ள கிரியாகோவ், தன் பணியின் முதல் பாதியில் புலனாய்வு அதிகாரியாகவும், 2001 செப்., 11 அமெரிக்காவில் நடந்த தாக்குதலுக்கு பின் அமைக்கப்பட்ட பயங்கரவாத எதிர்ப்பு நடவடிக்கைகளின் பாகிஸ்தான் பிரிவு தலைவராகவும் இருந்தார். பாகிஸ்தான் பணிக்கு பின், இவர் சி.ஐ.ஏ.,வின் செயல்பாடுகளுக்கான துணை இயக்குநரின் நிர்வாக உதவியாளராக உயர்ந்தார். கடந்த 2007ல் பேட்டியொன்றில், சி.ஐ.ஏ., கைதிகளை விசாரிக்கும் போது சித்ரவதை முறைகள் பயன்படுத்துவது குறித்து வெளிப் படுத்தினார். இதையடுத்து, ரகசிய தகவல்களை கசியவிட்டதற்காக கைது செய்யப்பட்டு, 23 மாதங்கள் தண்டனை அனுபவித்தார். பின்னர் அந்த வழக்கு கைவிடப்பட்டது.

'பெண் வேடத்தில் தப்பிய ஒசாமா பின்லேடன்' சி.ஐ.ஏ., முன்னாள் அதிகாரி ஜான் கிரியாகோவ் மேலும் கூறியுள்ளதாவது: கடந்த 2001, செப்., 11ல் அமெரிக்காவில் நடத்தப்பட்ட தாக்குதலின் முக்கிய குற்றவாளியான, அல் - குவைதா தலைவர் ஒசாமா பின்லேடனை அமெரிக்கா தேடி வந்தது. ஆப்கானிஸ்தானின் தோரா போரா மலைகளில் அவர் இருப்பதாக தகவல் கிடைத்தது. இதையடுத்து, அமெரிக்க படைகள் சுற்றி வளைத்தன. அப்போது, அமெரிக்க படை தளபதிக்கென மொழி பெயர்ப்பாளராக இருந்தவர், அல் -- குவைதா இயக்கத்தின் ஏஜென்ட் என்பதும், அவர் அமெரிக்க ராணுவத்தில் ஊடுருவியிருந்ததும் சி.ஐ.ஏ.,வுக்கு தெரியாது. அமெரிக்க படையால் சுற்றி வளைக்கப்பட்டதையறிந்த பின்லேடன், மொழிபெயர்ப்பாளர் வாயிலாக விடியற்காலை வரை கால அவகாசம் வழங்கும் படியும், பெண்களையும், குழந்தைகளையும் பாதுகாப்பாக வெளியேற்றிவிட்டு, சரணடைவதாகவும் கோரிக்கை விடுப்பதாக தெரிவித்தார். தளபதியையும் அவர் ஒப்புக்கொள்ள செய்தார். இதையடுத்து, விடியற்காலை வரை படைகள் காத்திருந்த நிலையில், பின்லேடன் பெண் உடையில் வேடமிட்டு, இருளின் மறைவில் ஒரு சரக்கு வாகனத்தின் பின்புறம் ஏறி பாகிஸ்தானுக்-கு தப்பிச் சென்றார். விடிந்தபோது, தோரா போரா மலை காலியாக இருந்தது. இதனால், பயங்கரவாதத்துக்கு எதிரான சண்டையை அமெரிக்கா, பாகிஸ்தானுக்கு மாற்ற வேண்டியிருந்தது. இவ்வாறு அவர் கூறினார்.

போரை தவிர்த்த இந்தியா! பாகிஸ்தான் பயங்கரவாதிகளுக்கு எதிராக சமீபத்தில், 'ஆப்பரேஷன் சிந்துார்' என்ற பெயரில் நடவடிக்கை எடுக்கப்பட்டது. இதை காங்கிரஸ் விமர்சித்தது. உடன், '2001ல் பார்லிமென்ட் மீது நடத்தப்பட்ட தாக்குதலுக்கு, அப்போது ஆட்சியில் இருந்த காங்கிரஸ் ஏன் நடவடிக்கை எடுக்கவில்லை' என்று பா.ஜ., பதிலடி தந்தது. இந்நிலையில், சி.ஐ.ஏ., முன்னாள் அதிகாரி ஜான் கிரியாகோவ் கூறியதாவது: இந்திய பார்லி., மீது நடந்த தாக்குதலுக்கு காரணமான, பாக்., ஆதரவு ஜெய்ஷ் - இ - முகமது அமைப்புக்கு எதிராக இந்தியா நடவடிக்கை எடுக்கும். அதனால், இரு நாட்டுக்கும் இடையே போர் மூளும் என்று அமெரிக்கா நினைத்தது. ஆனால், இந்தியா அமைதி காத்தது. பயங்கரவாதிகளுக்கு எதிராக அப்போதே நடவடிக்கை எடுத்திருந்தால், அதிக இழப்பு ஏற்பட்டிருக்காது. இவ்வாறு அவர் கூறினார்.