சிங்கப்பூரில், ரிவர் வேலி சாலையில் உள்ள சமையல் பள்ளி ஒன்றில், கடந்த 8ம் தேதி தீ விபத்து ஏற்பட்டது.

இதில், ஜனசேனா தலைவரும், ஆந்திர துணை முதல்வருமான பவன் கல்யாணின், 8 வயது மகன் மார்க் சங்கர் பவனோவிச் உட்பட, 20க்கும் மேற்பட்ட சிறுவர் - சிறுமியர் சிக்கினர்.

சிறுவர் - சிறுமியரின் அலறல் சத்தத்தை கேட்ட, அருகில் வேலை செய்து கொண்டிருந்த இந்திய புலம்பெயர் தொழிலாளர்கள் நான்கு பேர், சற்றும் யோசிக்காமல், அவர்களை காப்பாற்ற முயற்சித்தனர்.

ஜன்னல் அருகில் சிறுவர் - சிறுமியர் அழுகையுடன் நிற்பதை பார்த்த தொழிலாளர்கள், உடனடியாக ஏணியை கொண்டு வந்து பாதுகாப்பாக மீட்டனர்.

மீட்புப் படையினர் வரும் வரை காத்திருக்காமல், தங்களின் உயிரை பணையம் வைத்து, 10 பேரை அவர்கள் பத்திரமாக மீட்டனர்.

இந்நிலையில், தீ விபத்தில் சிக்கிய சிறுவர் - சிறுமியரின் உயிரை காப்பாற்றிய இந்திய புலம்பெயர் தொழிலாளர்கள் இந்தர்ஜித் சிங், சுப்பிரமணியன் சரண்ராஜ், நாகராஜன் அன்பரசன், சிவசாமி விஜயராஜ் ஆகியோருக்கு, மனிதவள அமைச்சகத்தின் உத்தரவாதம், பராமரிப்பு மற்றும் ஈடுபாட்டு குழுவிலிருந்து, நாணயங்களை அளித்து சிங்கப்பூர் அரசு கவுரவித்துள்ளது.