சொந்த ஊரில் கொண்டாட்டம்!

சுனிதா வில்லியம்சின் தந்தை தீபக் பாண்டயா, குஜராத் மாநிலம் மேஷானா மாவட்டம் ஜூலாசனைச் சேர்ந்தவர். கடந்த, 1957ல் அவர் அமெரிக்காவுக்கு சென்றார். தாய் உர்சுலின் போனி பாண்டயா, ஸ்லோவேனியாவைச் சேர்ந்தவர்.சுனிதா வில்லியம்ஸ், மூன்று முறை இந்தியாவுக்கு வந்துள்ளார். கடந்த 2007 மற்றும் 2013ல் விண்வெளி பயணங்களுக்குப் பின், இந்தியா வந்தார்; சொந்த ஊருக்கும் சென்றார். கடந்த 2008ல் பத்மபூஷண் விருதைப் பெறுவதற்காக வந்தார்.சுனிதா வில்லியம்ஸ் பத்திரமாக பூமிக்கு திரும்பியதை, ஜூலாசன் கிராமத்தைச் சேர்ந்தவர்கள் பட்டாசுகள் வெடித்தும், இனிப்புகள் வழங்கியும் கொண்டாடினர். அங்குள்ள கோவில் வளாகத்தில் அமைக்கப்பட்டிருந்த திரையில், சுனிதா பூமிக்கு திரும்புவதை, ஊர் மக்கள் ஒன்றாக கூடி பார்த்தனர்.முன்னதாக அவர் பத்திரமாக திரும்புவதற்காக, கோவிலில் பூஜை, யாகம் செய்யப்பட்டன. மேலும், அகண்ட தீபமும் ஏற்றி வழிப்பட்டனர்.