அமெரிக்காவின் 47வது அதிபராக, ஜன., 20ல் பதவியேற்ற குடியரசு கட்சியின் டொனால்டு டிரம்ப் பல்வேறு அதிரடி அறிவிப்புகளை வெளியிட்டு வருகிறார். அந்த வகையில், அதிபர் டிரம்ப், 'மெக்சிகோ, கனடா ஆகிய நாடுகளில் இருந்து இறக்குமதி செய்யப்படும் பொருட்களுக்கு, 25 சதவீத வரி விதிக்கப்படும். எனினும், எண்ணெய், இயற்கை எரிவாயு மற்றும் மின்சாரம் உட்பட கனடாவிலிருந்து இறக்குமதி செய்யப்படும் எரிசக்திக்கு, 10 சதவீத வரி விதிக்கப்படும்.

இதேபோல், சீனாவில் இருந்து இறக்குமதி செய்யப்படும் பொருட்களுக்கு, கூடுதலாக, 10 சதவீத வரி விதிக்கப்படும்' என்றார். கூடுதல் வரி விதிப்பால் மெக்சிகோ, கனடா ஆகிய நாடுகள் கடும் அதிருப்தி அடைந்தன. அமெரிக்க பொருட்களுக்கு, 25 சதவீத வரி விதிக்கப்படுவதாக கனடா பிரதமர் ஜஸ்டின் ட்ரூடோ அறிவித்தார். அதேபோல், சீனா, மெக்சிகோ நாடுகளும் அமெரிக்க பொருட்களுக்கு இறக்குமதி வரி விதிக்கப்படும் என தெரிவித்தது.

இது தொடர்பாக, அமெரிக்கா அதிபர் டொனால்டு டிரம்ப் கூறியதாவது: வரிகளுக்கு எதிரான பதிலடி நடவடிக்கைகளுடன் நாடுகள் செயல்படுவதால், அமெரிக்க மக்கள் சில வலியை உணரக்கூடும். வலிக்கு விலைமதிப்பு அதிகம். கனடாவிடம் உற்பத்தியாகும் எந்த பொருட்களும் எங்களுக்கு தேவையில்லை.

எங்களுக்கு ஆற்றல் இருக்கிறது. நாங்கள் சொந்தமாக உருவாக்குவோம் எங்களுக்கு தேவையான அளவைவிட அதிகமாக வைத்திருப்போம். கனடாவை அமெரிக்காவின் 51வது மாகாணமாக உருவாக்குவோம். அதன் மூலம் கனடா மக்களுக்கு மிக குறைந்த வரி மற்றும் ராணுவ பாதுகாப்புகள் ஆகியவற்றை உருவாக்குவோம். இவ்வாறு அவர் கூறினார்.