ஜனவரி 20ல் அமெரிக்க அதிபராக பொறுப்பேற்கும் டிரம்ப், நிர்வாகத்தில் முக்கிய பொறுப்புகளுக்கு ஆட்களை நியமித்து வருகிறார். அந்த வகையில் இந்தியரான ஸ்ரீராம் கிருஷ்ணனை செயற்கை நுண்ணறிவு ஆலோசகராக நியமித்தார். இதை விமர்சனம் செய்து டிரம்ப் கட்சியின் முக்கிய நிர்வாகிகள் கருத்துக்களை பதிவிட்டு வருகின்றனர்.

ஆனால், டிரம்ப் ஆதரவாளர்களான எலான் மஸ்க், விவேக் ராமசாமி ஆகியோர், அறிவு சார்ந்த தொழில்நுட்ப பணியாளர்களை அமெரிக்கா பயன்படுத்திக் கொள்வதற்கு ஆதரவு தெரிவித்து கருத்துக்களை பதிவிடுகின்றனர். H-1B விசாவில் அமெரிக்காவிற்கு குடிபெயர்ந்த மஸ்க் தனது எக்ஸ் வலைதளத்தில், 'உங்கள் அணி வெற்றி பெற விரும்பினால், அதற்கு நீங்கள் திறமையானவர்களை உங்கள் அணியில் சேர்க்க வேண்டும். அமெரிக்காவிற்கு வந்து இந்த நாட்டிற்கு பங்களிப்பதற்காக கடுமையாக உழைத்திருந்தால், அவர்களுக்கு என் மரியாதை உண்டு' என கூறினார்.

விவேக் ராமசுவாமி, “பிரச்னை குடியேற்றத்தில் இல்லை, மாறாக அமெரிக்க கலாசாரத்திலேயே உள்ளது. அமெரிக்க பெற்றோர் தங்கள் குழந்தைகளை தவறாக வளர்க்கிறார்கள். பெற்றோர் தங்கள் குழந்தைகளின் கல்வியில் அதிக கட்டுப்பாட்டைக் கொண்டிருக்க வேண்டும். தற்போதைய கல்வி முறையில் குறைபாடுள்ளது” என்று தெரிவித்து இருந்தார்.

இப்படி தன் கட்சியிலேயே, இரு தரப்பினர் நேருக்கு நேராக மோதிக் கொண்டிருக்கும் சூழலில்,

'எச்-1 பி விசாவை நான் எப்போதும் ஆதரிக்கிறேன்' என டொனால்டு டிரம்ப் தெரிவித்துள்ளார்.

எலான் மஸ்க் நிலைப்பாட்டிற்கு, டிரம்ப் ஆதரவு தெரிவித்து உள்ளார். 'நான் எப்போதும் விசாக்களை விரும்பினேன், நான் எப்போதும் விசாக்களுக்கு ஆதரவாக இருக்கிறேன். அதனால் தான் H1B விசாக்கள் எங்களிடம் உள்ளன' என டொனால்டு டிரம்ப் கூறியுள்ளார்.

எச்-1பி விசா என்பது தொழில்நுட்ப திறன் வாய்ந்த பணியாளர்கள் தற்காலிக அடிப்படையில் அமெரிக்காவுக்குள் நுழைய அனுமதி அளிக்கிறது. இதை வைத்திருப்பவர்கள், அமெரிக்காவில் 3 ஆண்டுகள் தங்கி இருக்கலாம். அதிகபட்சமாக 6 ஆண்டுகள் இருக்கலாம்.