புதுச்சேரியில் உள்ள ராஜிவ்காந்தி உள் விளையாட்டு மைதானத்தில், 40வது தேசிய இளைஞர் கூடைப்பந்து போட்டி நடந்தது. அரையிறுதி போட்டியில், சத்தீஸ்கரை தோற்கடித்த கர்நாடக அணி, இறுதி சுற்றுக்கு தேர்வானது. நேற்று முன்தினம் நடந்த இறுதி போட்டியில், கர்நாடகா அணியும், மஹாராஷ்டிரா அணியும் மோதின.

கர்நாடகாவின் மெஹக் சர்மா 16 புள்ளிகளும், அணி கேப்டன் அதிதி சுப்பிரமணியன், நிரிஷா ஆகியோர் தலா 10 புள்ளிகளும் பெற்றுத்தந்தனர்.

ஆனால், மஹாராஷ்டிரா அணியின் ரேவா குல்கர்னி 26 புள்ளிகளும், வைஷ்ணி 25 புள்ளிகளையும் பெற்று, அந்த அணியின் வெற்றிக்கு வழிவகுத்தனர்.

பரபரப்பான ஆட்டத்தில், இறுதியில் மஹாராஷ்டிரா 76 புள்ளிகளும், கர்நாடகா 49 புள்ளிகளும் பெற்றன. இரண்டாம் இடம் பிடித்த கர்நாடக அணிக்கு, வெள்ளி பதக்கத்துடன் 2 லட்சம் ரூபாய் பரிசு தொகை வழங்கப்பட்டது. மேலும், எப்.ஐ.பி.ஏ., ஆசிய தலைவர் கோவிந்தராஜ், 5 லட்சம் ரூபாய்க்கான ஊக்கத்தொகையை அறிவித்தார் - நமது நிருபர் -.