மைசூரு நகரின், சரஸ்வதி புரத்தில் மஹாபோதி பள்ளி உள்ளது. இப்பள்ளி மிகவும் பிரபலமானது. இங்கு ஒன்றாம் வகுப்பு முதல், பத்தாம் வகுப்பு வரை, மாணவர்கள் கல்வி பயில்கின்றனர்.

வெளிநாடுகளில் இருந்தும் மாணவர்கள், இந்த பள்ளிக்கு வந்து கல்வி கற்கின்றனர். பள்ளியில் கராத்தே உட்பட, பல்வேறு கலைகளும் கற்றுத்தரப்படுகின்றன. விடுதி வசதியும் உள்ளது.

இதே பள்ளியில் அஜித் என்ற மாணவர் படித்து வந்தார். இவர் கராத்தே மட்டுமின்றி, அனைத்து விளையாட்டுகளிலும் திறன் மிக்கவர்.

பள்ளி சார்பில் போட்டிகளில் பங்கேற்று, பரிசுகளை வென்றுள்ளார். இவரால் பள்ளிக்கு பெருமை கிடைத்தது. ஆனால் எதிர்பாராவிதமாக அவர் அகால மரணம் அடைந்தார்.

இதனால் பள்ளி நிர்வாகமும், நண்பர்களும் அடைந்த வருத்தத்துக்கு அளவே இல்லை. அவர் இறந்து 15 ஆண்டுகளாகியும், பள்ளி அந்த மாணவரை மறக்கவில்லை. அவரை நினைவு கூரும் வகையில், அவரது பெயரில் ஆண்டு தோறும் கராத்தே போட்டி நடத்துகிறது. வெற்றி பெற்றவர்களுக்கு விருது வழங்குகிறது.

கல்வியில், விளையாட்டுகளில் சாதனை செய்தாலும், மாணவர்களை பள்ளிகள் நினைவுகூர்வது அபூர்வம். தங்கள் பள்ளிக்கு பெருமை சேர்த்த மாணவர் இறந்து, 15 ஆண்டுகளாகியும் அவரை மறக்காததுடன், அவரை நினைவு கூரும்ம் வகையில், கராத்தே போட்டி நடத்துவதன் மூலம், மஹாபோதி பள்ளி முன் உதாரணமாக விளங்குகிறது.

- நமது நிருபர் -