'பேலிஸ்டிக் மிசைல்' எனப்படும் கண்டம் விட்டு கண்டம் பாய்ந்து இலக்கைத் தாக்கும் அதிநவீன ஏவுகணைகள் உலகில் பல நாடுகளில் பாதுகாப்புக்காக தயாரிக்கப்படுகின்றன. அணு ஆயுதம், ஏவுகணை உள்ளிட்டவை உலக அமைதியை சீர்குலைகும் என உலக நாடுகளுக்கு அறிவுறுத்தப்படும் போதிலும் தாய்நாட்டின் பாதுகாப்பு கருதி இதுபோன்ற ஏவுகணை தயாரிப்பு தேவைப்படுவதை மறுப்பதற்கில்லை.

1980 ஆம் ஆண்டு அப்துல் கலாம் தலைமையில் உருவாக்கப்பட்ட இண்டகிரேட்டட் கைடட் மிசைல் டெவலப்மென்ட் ப்ரோக்ராம் (Integrated Guided Missile Development Program) செயல்திட்டத்தில் அக்னி ஏவுகணை உருவாக்கப்பட்டது. அப்துல் கலாமின் அக்னி ஏவுகணை சோதனை வெற்றி பெற்றதையடுத்து இன்று அக்னி ஏவுகணைகள் பல பரிசோதிக்கப்பட்டு வருகின்றன.

முன்னதாக ஒடிசா அருகே உள்ள அப்துல் கலாம் தீவில் அக்னி-1 ஏவுகணை ஏவப்பட்டு பரிசோதிக்கப்பட்டது. இன்று அமெரிக்கா, சீனா, ரஷ்யா, வடகொரியா போல ஏவுகணை கையிருப்பு மற்றும் பரிசோதனையில் இந்தியாவும் முன்னணி வகித்து வருவதற்கு அப்துல் கலாமே காரணம் என்றால் அது மிகையில்லை.