சில ஆண்டுகளுக்கு முன்பு வரை செங்கல்லால் ஏற்படும் பாதிப்புகளை தவிர்க்க ஹாலோ பிளாக் கற்கள் சிறந்த மாற்று பொருளாக பரிந்துரைக்கப்பட்டன. குறிப்பாக, சுற்றுச்சூழல் பாதிப்புகளை தவிர்க்கவும், நீங்கள் கட்டும் புதிய வீடு குளுகுளுவென இருக்க ஹாலோ பிளாக் கற்கள் தான் சிறந்த மாற்றுப் பொருள் என்று பலரும் நினைத்தனர்.

இந்த பின்னணியில் பெரும்பாலான நிறுவனங்கள் ஹாலோ பிளாக் கற்கள் தயாரிப்பில் சுறுசுறுப்பாக இறங்கியுள்ளன. இதனால், தற்போது, சிறிய ஊர்களிலும் ஹாலோ பிளாக் கற்கள் தயாரிப்பு நிறுவனங்கள் வந்துவிட்டன என்பதை மறுக்க முடியாத நிலை ஏற்பட்டுள்ளது.

எரிசாம்பலையும், பொடியான ஜல்லிகளையும் சேர்த்து தயாரிக்கப்படும் ஹாலோ பிளாக் கற்கள் தொடர்பான எதிர்மறை விமர்சனங்கள் என்ன என்பதையும் பொது மக்கள் தெரிந்துக்கொள்ள வேண்டும்.

செங்கல் போன்று, ஹாலோ பிளாக் கற்களுக்கான தயாரிப்பு நிலை தர கட்டுப்பாடு விதிகள் முறையாக இறுதி செய்யப்படவில்லை.

இதன் அளவுகள் தொடர்பான வரையறை உருவாக்கப்பட்டு இருந்தாலும், அதில் சுமை தாங்கும் திறன் தொடர்பான வழிமுறைகள் குழப்பமாக உள்ளது. மேலும், தரக்கட்டுப்பாடு அடிப்படையில் இதை பரிசோதிப்பதற்கான வழிமுறைகளும் தெளிவாக இல்லை.

குறிப்பாக, புதிய கட்டடங்களில் ஹாலோ பிளாக் கற்களை பயன்படுத்தும் போது சில அடிப்படை விஷயங்களை கருத்தில் கொள்ள வேண்டும். இதை பயன்படுத்தி எழுப்பப்படும் சுவர்களை முழுமையாக பூச்சு வேலை மேற்கொள்ள வேண்டியது அவசியம்.

வெளிப்புற பூச்சு வேலை இன்றி ஹாலோ பிளாக் சுவர்களை அமைத்தால், சில ஆண்டுகளில் இந்த கற்கள் படிப்படியாக கரைய துவங்கும். இதில் சேர்க்கப்பட்டுள்ள கலவை, வெளிப்புற காற்றின் ஈரப்பதத்தால் மெல்ல கரையும் போது, அதில் உள்ள பொடி ஜல்லிகள் உதிரும் நிலை ஏற்படும்.

இது போன்ற விஷயங்களை தெரியவந்த நிலையில் ஹாலோ பிளாக் கற்களை முழுமையாக தவிர்க்க நினைக்காதீர்கள். இந்த வகை கற்களை முழுமையான பூச்சு வேலை செய்யக்கூடிய இடங்களுக்கு பயன்படுத்தலாம்.

அதே சமயம், தரமான பொருட்களை வாங்குவதில் கவனமாக இருக்க வேண்டும் என்கின்றனர் கட்டுமான துறை வல்லுனர்கள்.