அவர்தான் வடகிழக்கு மாநிலமான நாகாலாந்தின் 'ஆவோ-நாகா' பழங்குடியினப் பண்பாட்டுத் தூதர் — குரு சாங்யூசாங் பொங்கெனர்!புதுடெல்லி குடியரசுத் தலைவர் மாளிகையின் கம்பீரமான தர்பார் மண்டபத்தில் இன்று நடைபெற்ற பத்ம விருதுகள் வழங்கும் விழாவில், நாகாலாந்தின் பாரம்பரிய பழங்குடியின உடையும், தலையில் இறகுகள் சூடிய கிரீடமும் அணிந்து கம்பீரமாக நடந்து வந்து, குடியரசுத் தலைவர் திரௌபதி முர்மு அவர்களிடம் இருந்து அவர் 'பத்மஸ்ரீ' விருதைப் பெற்றுக் கொண்ட காட்சி, வெறும் ஒரு விருது வழங்கும் நிகழ்வு அல்ல; அது அழியும் விளிம்பில் இருக்கும் ஒரு பூர்வகுடி கலைக்கு பாரத தேசம் வழங்கிய ஆகச்சிறந்த கௌரவம்!

1945-ல் நாகாலாந்தின் மொகோக்சுங் மாவட்டத்தில் உள்ள உங்மா என்ற ஒரு சிறிய கிராமத்தில் பிறந்த சாங்யூசாங் பொங்கெனர், தன் இளமைக் காலத்தில் ஒரு துடிப்பான கால்பந்து வீரராக வலம் வந்தவர். ஆனால், காலப்போக்கில் நவீன உலகம் தன் சமூகத்தின் பாரம்பரிய நாட்டுப்புறப் பாடல்களையும், நடனங்களையும், கதைகளையும் கொஞ்சம் கொஞ்சமாக மறந்து வருவதைக் கண்டு அவரது மனம் ஏங்கியது.

நாகா பழங்குடியினரின் ஆன்மாவாக விளங்கும் ஆவோ-நாகா கலை வடிவங்கள் அடுத்த தலைமுறைக்குக் கடத்தப்படாமல் அழிந்துவிடுமோ என்ற பயம் அவரிடம் ஒரு பெரும் நெருப்பை மூட்டியது. அன்றிலிருந்து, கடந்த ஆறு தசாப்தங்களாக (60 ஆண்டுகள்) தன் வாழ்நாளை அந்தக் கலையைக் காப்பதற்கே முழுமையாக அர்ப்பணித்தார்.

சாங்யூசாங் அவர்கள் கலையைத் தனக்குள்ளேயே பூட்டி வைக்கவில்லை. 1982-ல் 'நாகா வாதீர் கிளப்' என்ற கலாச்சார அமைப்பைத் தொடங்கி, அதன் மூலம் கிராமம் கிராமமாகச் சென்று இளைஞர்களைத் தேடிப் பிடித்துத் தன் கலையைக் கற்றுக்கொடுத்தார்.இதுவரை 2,000-க்கும் மேற்பட்ட இளம் கலைஞர்களுக்கு ஆவோ-நாகா பாரம்பரிய கலைகளை, எந்தவித பிரதிபலனும் எதிர்பாராமல் ஒரு தவத்தைப் போலக் கற்றுத் தந்துள்ளார். அவரது விரல் பிடித்து வளர்ந்த 100-க்கும் மேற்பட்ட முதன்மை சீடர்கள் இன்று உலகெங்கும் உள்ள சர்வதேச மேடைகளில் நாகாலாந்தின் புகழைப் பாடி வருகிறார்கள்.

81 வயதான இந்த முதியவர், இன்றும் இந்திய அரசின் 'கலா-தீக்ஷா' திட்டத்தின் கீழ் இளம் தலைமுறையினருக்கு ஒரு வழிகாட்டியாக ஓயாது உழைத்துக் கொண்டிருக்கிறார் என்பதுதான் அவரது அர்ப்பணிப்புக்கு மிகச் சிறந்த சான்று.

இன்று டெல்லி தர்பார் மண்டபத்தில், நாட்டின் மிக உயரிய பிரமுகர்களுக்கு நடுவே, தன் பூர்வகுடிப் பாரம்பரிய உடையில் சாங்யூசாங் நின்றபோது, அது இந்தியாவின் பன்முகத்தன்மையின் ஆகச்சிறந்த அடையாளமாகத் திகழ்ந்தது. ஏற்கனவே சங்கீத நாடக அகாடமி விருது, மாநில அரசின் ஆளுநர் விருது, மதிப்புறு 'குரு' பட்டம் எனப் பல கௌரவங்களைப் பெற்றிருந்தாலும், இன்றைய 'பத்மஸ்ரீ' விருது அவரது வாழ்நாள் அர்ப்பணிப்புக்குக் கிடைத்த முத்தாய்ப்பான அங்கீகாரமாகும்.

இன்றைய நவீன இளைஞர்களுக்கு இந்த 81 வயது கலை மாமணி சொல்லும் செய்தி ஒன்றுதான்:

'சமூகம் எவ்வளவு வேகமாக மாறினாலும், நமது அடையாளத்தைத் தீர்மானிக்கும் நமது பாரம்பரிய நாட்டுப்புறப் பாடல்களும், நடனங்களும், மதிப்புகளும் உண்மையான அர்ப்பணிப்புடன் பாதுகாக்கப்பட வேண்டும். இளைஞர்களே... உங்கள் வேர்களைத் தேடிப் பாரம்பரியத்தைப் பற்றிக் கொள்ளுங்கள்!'

நாகாலாந்தின் மலைக் கிராமத்து மண்ணில் பிறந்து, இன்று டெல்லி மாளிகையில் பத்மஸ்ரீ விருதுடன் மின்னும் குரு சாங்யூசாங் பொங்கெனர், வெறும் ஒரு கலைஞர் மட்டுமல்ல; இந்தியாவின் அரிய கலாச்சாரப் பொக்கிஷங்களை அடுத்த தலைமுறைக்கு ஏந்திச் செல்லும் ஒரு உன்னத மனிதநேயத் தூதர்!

-எல்.முருகராஜ்.