PUBLISHED ON : பிப் 18, 2019

சமீபத்தில் சின்னத்தம்பி யானையைப் பிடித்ததும் காட்டில் விட்டதும் அனைவர் கவனத்தையும் கவர்ந்தது. கோவையைப் போன்ற பெரிய நகரத்தின் புறநகர்ப் பகுதிகளை ஒட்டி நல்ல காடுகள் இருக்கின்றன. இதனால், யானைகள் போன்ற பேருயிர்கள் அவற்றின் இயல்பு மாறி, அசாதாரணமாக நடந்து கொள்வது இயற்கை.
இந்தக் காடுகள் பல ஆண்டுகளாக, யானைகளின் வலசைப் பாதைகளாக இருந்தன. சின்னத்தம்பியின் வலசைப் பாதையில் பல அமைப்புகள் தற்போது தோன்றி உள்ளன.
தனக்கு வேண்டிய உணவும் நீரும் நகர்ப்புறத்தில் எளிதில் கிடைப்பதால் சின்னத்தம்பி தங்க நினைத்திருக்கலாம். ஆனைகட்டி பகுதி மக்களுக்கு சின்னத்தம்பியால் எந்தத் தொந்தரவும் ஏற்பட்டதில்லை.
மனிதர்களைப் போல் சின்னத்தம்பியும் தன் தேவைகளைப் பூர்த்தி செய்துகொண்டு வாழ்ந்து வந்தான். ஆனால், விவசாயிகள் மற்றும் செங்கல் சூளை முதலாளிகளுக்குப் பயம். பொருட்சேதம் முக்கியமான காரணம். யானை குறித்த அச்சம் ஏற்பட்டதால் வேறு வழிதெரியாமல், மாவட்ட ஆட்சியரிடமும், சென்னையில் முதன்மை வனப் பாதுகாவலரிடமும் முறையிட்டதோடு அரசியல் அழுத்தமும் கொடுத்ததால், சின்னத்தம்பியைப் பிடிக்க முடிவாகியது.
காட்டை ஒட்டிய பகுதிகளில் வளர்ச்சிப் பணிகள் மற்றும் விவசாயம் நடப்பது வனவிலங்குகளின் இயல்பு நடத்தையை மாற்றும் என்பதற்கு இது ஒரு நல்ல உதாரணம்! சின்னத்தம்பியின் பலமும் பலவீனமும் ஒன்றே! அதாவது மனிதர்களுடன் இணக்கமாகப் போவது.
- சு.சந்திரசேகரன், யானை கணக்கெடுப்பாளர்
