சீக்கியர்களின் முதன்மைச் புனிதத் தலங்களான அமிர்தசரஸ் பொற்கோயில் மற்றும் அகால் தகத் ஆகியவற்றை ஆபத்தான காலகட்டங்களில் பாதுகாக்கும் பொறுப்பை நிஹாங் அமைப்பினரே ஏற்று நடத்தினர்.

மிக உயரமான நீலத் தலைப்பாகை அணிந்து, அதில் சிறிய வாள்கள், சக்கரங்கள் மற்றும் இரும்புச் சங்கிலிகளைச் சூடியிருப்பார்கள்.எக்காலத்திலும் தற்காப்பு ஆயுதங்களான கர்தார் , கந்தி (வாள்), ஈட்டி, வில்-அம்பு மற்றும் மரக் கேடயங்களை உடன் வைத்திருப்பர்.

பாரம்பரிய வாள்வீச்சு மற்றும் தற்காப்புக் கலைகளில் சிறுவயதிலிருந்தே பயிற்சி பெறுகின்றனர். ஒரே நேரத்தில் பல குதிரைகளை அடக்கும் குதிரையேற்ற சாகசங்களில் உலகப் புகழ்பெற்றவர்கள்.

இவர்களில் பெரும்பாலோர் துறவற வாழ்வை மேற்கொள்பவர்கள். குறிப்பிட்ட முகாம்களில் குழுவாக வாழ்ந்து, தொடர் உடற்பயிற்சி, தற்காப்புப் பயிற்சி மற்றும் இறை வழிபாட்டிலேயே நேரத்தைச் செலவிடுகின்றனர்.

இவர்கள் பேசும் பஞ்சாபி பேச்சு வழக்கில் ஒரு தனித்துவமான ராணுவக் கலைச்சொல் முறை உண்டு. உதாரணமாக, ஏழ்மையைக் குறிக்க 'செல்வம்' என்றும், ஒற்றை நிஹாங் வீரனைக் குறிக்க 'சவா லாக்' (ஒரு லட்சம் பேருக்குச் சமமானவன்) என்றும் அழைப்பார்கள்.

தற்காலத்தில் போர்கள் இல்லாதபோதிலும், நிஹாங் வீரர்கள் சீக்கிய மரபின் வீரத்தின் அடையாளமாக வாழ்ந்து வருகின்றனர். ஆண்டுதோறும் தீபாவளி மற்றும் ஹோலி திருவிழாக்களின் போது அமிர்தசரஸ் மற்றும் ஆனந்த்பூர் சாஹிப் ஆகிய இடங்களில் இவர்கள் நிகழ்த்தும் சாகசங்கள் உலகப் புகழ்பெற்றவை.

இந்த விழாவின் உச்சக்கட்டமாகக் காணப்படுவது இவர்களின் குதிரையேற்ற சாகசங்கள்தான்! ஒரே நேரத்தில் இரண்டு குதிரைகளைத் தமது கட்டுப்பாட்டிற்குள் அடக்கி, அவற்றின் மீது கம்பீரமாக நின்றவாறு சீறிப்பாயும் இவர்களின் துணிச்சல் காண்போரை மிரளச் செய்யும். குதிரைகளின் குளம்படிகளால் புழுதி பறக்க, அச்சு அசலாக ஒரு நிஜப் போர்க்களத்தையே கண்முன்னே நிறுத்துகின்றன இந்த வீர விளையாட்டுகள்.

காலங்காலமாகத் தொடரும் இந்த உத்வேகம் நிறைந்த சிலிர்ப்பூட்டும் நிகழ்வைக் கண்குளிரக் கண்டு களிப்பதற்காகவே, நாட்டின் பல்வேறு மூலைகளிலிருந்தும் பல்லாயிரக்கணக்கான பார்வையாளர்கள் அமிர்தசரஸ் மண்ணில் பெருந்திரளாக வந்திருந்தனர்.

-எல்.முருகராஜ்.