இங்கு மனம்திறக்கிறார் மனநல நிபுணர் காயத்ரி...

ஒரு மனிதன் சம்பவங்களை சொல்லும் போது, மனநல நிபுணராக அவனின் உணர்வுகளை கவனிக்க வேண்டும். உணர்வுகளை கையாள இலக்கியம் எனக்கு உதவியாக இருக்கிறது. குழந்தைகள் முதல் பெரியவர் வரை வயதிற்கு ஏற்றவாறு கவுன்சிலிங் மாறுபடும். போதை மறுவாழ்வு கவுன்சிலிங், தம்பதியினருக்கான கவுன்சிலிங் என நிறைய வகை உண்டு. நமக்கான ஆடியன்ஸ் யார் என்பதை அறிந்து அதற்கு கவுன்சிலிங் பயிற்சி எடுத்து இத்துறைக்குள் வருவது நல்லது.

ஒரு பள்ளிக்கு சிறப்பு விருந்தினராக சென்ற போது, ஒரு மாணவன் மட்டும் யார் சொல்வதையும் கேட்காமல் பிடிவாதமாக இருந்ததைக்காண நேரிட்டது. இதுவே மனநல கட்டுரைகளை எழுதத்துாண்டியது. இலக்கியத்தின் மூலம் சமூகத்தின் அவலங்களை அறிய நேரிடும். அங்கு உங்களால் யாரையும் இவர் இப்படி தான் என மதிப்பிட முடியாது.என்னுடைய ஸ்டைல் யாரையும் மதிப்பிடாமல் எழுதுவது. உளவியல் பிரச்னை தனிநபருக்கானது இல்லை; சமூக பிரச்னை என என் எழுத்துக்களில் பிரதிபலிக்கிறேன்.

தற்கொலையும் குணாதிசயமும் ஒருவர் செய்யும் தற்கொலையின் வகையை வைத்தே அவர் குணாதிசயங்களை கண்டறிய முடியும். உதாரணமாக பொது இடத்தில் ஒருவர் தன் உயிரை மாய்த்துக் கொள்வதன் நோக்கம் 'இந்தப் பாழாய் போன சமூகம் தான் என் சாவிற்கு காரணம்' என்று உணர்த்துவதே. சூழல் ரீதியாகவும், மரபணு ரீதியாகவும் மனநல பிரச்னைகள் வரும்.

'The Biology of Belief' நுால் ஒருவனுக்கு சரியான நண்பர்கள், ஆசிரியர்கள் கிடைத்தால் உடலின் செல்களும் சிந்தனை மாற்றத்தை துாண்டும் எனக் கூறுகிறது. எனவே மாணவர்களுக்கு நல்ல ஆசிரியர்களும், நல்ல நண்பர்களும் கிடைப்பது அவசியம்.

கையில் அதீத பணப்புழக்கமும், போதை பொருட்கள் பயன்பாடும் அதிகரிக்கும் போது தவறுகள் அதிகமாகின்றன. இலக்கியங்கள் மனிதனின் அகத்தை, யாரும் பார்க்காத விஷயங்களை வெளிப்படுத்தும்.

நடுத்தர வயதில் எதிர்காலம், இறப்பு பற்றி ஆழமாக சிந்திக்கும் போது மனச்சோர்வு, வருத்தம், பதட்டம் கலந்த உணர்வு பலருக்கு மேலோங்கும். இது இயல்பு. நடுத்தர வயது தம்பதியினர் இதை எதிர்கொள்ள தங்கள் இணையருடன் மனம் விட்டு பேசுவது அவசியம்.

உறவுச்சிக்கல்கள் இன்றைய சமூகத்தில் உறவுச் சிக்கல்கள் அதிகமாகி வருகின்றன. ஆண் குடிகாரனாகவும், வேலை இல்லாதவனாகவும் இருக்கும்போது தனக்கான 'ஹீரோ இமேஜை' பெண்ணிடம் இழந்து விடுகிறான். பெண்கள் தனக்கான ஹீரோவை திரைக்குப் பின்னாலும் நடித்துக் கொண்டிருக்கும் நடிகர்கள் வழி தேடுகிறார்கள்.

'வெற்றி ஒன்று தான் வாழ்வின் மகத்தான குறிக்கோள்' என்ற தவறான கருத்து ஊக்குவிக்கப்படுகிறது. நிதானமே இல்லாத மனிதனால் தன்னம்பிக்கை மட்டும் வைத்துக் கொண்டு ஒன்றும் செய்ய முடியாது. நன்னெறி, தத்துவம் சார்ந்த நூல்களை படித்தால் நிதானத்தை கற்றுத் தரும்.

அலைபேசிகள் வருகையால் இன்றைய உலகில் வாசிப்பு குறைந்து விடவில்லை. நுால்கள் படிக்கின்றவர்கள் அதிகம் உள்ளனர். ஒரு புத்தகத்தை வாசிக்கும் போது, 'ஆமால்ல நமக்கும் இப்படி எல்லாம் இருந்துச்சுல..' எனத் தோன்றும். இது தான் புத்தகத்திற்கும், காட்சி ஊடகத்திற்குமான வித்தியாசம். இவ்வாறு கூறினார்.