'விசில் அடிக்கத் தெரியும்; விசில் ஊதப் பிடிக்கும்; ஆனால், அதை நடிகருக்கோ அரசியல்வாதிக்கோ அல்லாது யாருக்காக எதற்காக செய்ய வேண்டும் என்ற தெளிவு எங்களிடம் உண்டு' எனச் சொல்லும் இவர்கள் மதுரை, சுப்பலட்சுமி லட்சுமிபதி அறிவியல் கல்லுாரி யின் இளங்கலை பிரிவு பொக்கிஷங்கள்!

'சந்திரயான், மங்கள்யான் விண்வெளி திட்டப் பணிகளின் மூலம் நம் தேசத்திற்கு உலகளாவிய பெருமை ஈட்டிய இந்தியாவின் 'ராக்கெட் பெண்' விஞ்ஞானி ரிது கரிதால்; சவாலான தருணங்களில் நிதானமாக முடிவெடுக்கும் அவரது மனவுறுதியே என் இலக்கை உயரமாக நிர்ணயிக்க காரணம்; அவருக்கே என் விசில்!'

மு.நீ.காயத்ரி பிரசாத், கணினி அறிவியல்

'நெல்லை விரைவு ரயிலில் பார்வையற்ற ஒருவர் தன் இணையோடு பேனாக்கள் விற்றுக் கொண்டு இருந்தார். இருள் உலகெனினும் பிறர் கருணை எதிர்பாராது உழைக்கும் அவரது எண்ணத்தில் பெரும் திண்ணம்; இன்றும், நான் துவளும் தருணங்களில் என்னை மீட்டெடுப்பது அவரிடம் வாங்கிய அந்த பேனா மட்டுமே; அவர் எனக்கான ஒளி!'

பா.வித்யலட்சுமி, அனிமேஷன்

'ரத்தன் டாடா; 'கொரோனா' பேரிடர் காலத்தில் வாரி வழங்கிய கொடையாளி; எளிமையின் அடையாளமாய், அடக்கத்தின் மறு உருவமாய், சிறந்த சமூக நலவாதியாய், மனிதநேயம் மிக்கவராய்... இன்னும் சொல்லிக் கொண்டே போகலாம். 'செய்யும் எல்லாவற்றிலும் சிறந்தவர்களாக இருங்கள்' எனும் பாடம் சொன்ன இச்சிகரத்திற்கே என் விசில்!'

எம்.கே.ராமேஸ்வரன், எம்.சி.ஹெச்.எம்.,