நாடு முழுவதும் தீபாவளி பண்டிகை மிகுந்த உற்சாகத்திலும், ஆனந்தத்திலும் கொண்டாடப்பட்டது. வீடு வீடாக தீபங்கள் ஏற்றி, வானத்தில் பட்டாசுகள் பறக்க, நகரங்களும் கிராமங்களும் ஒளியால் ஒளிர்ந்தன. ஒளி இருளை வெல்வதை குறிக்கும் இந்த நாள், நன்மை தீமையை வென்ற வெற்றியின் அடையாளமாக மக்களின் இதயங்களில் நம்பிக்கையையும் மகிழ்ச்சியையும் பரப்பியது.மும்பை: தீபாவளி முன்னோட்டமாக சத்திரபதி சிவாஜி பூங்காவில் வானத்தை ஒளிரச்செய்த பட்டாசுகள், மக்களின் கண்களையும் இதயங்களையும் கவர்ந்தன. ஒளி மற்றும் ஒலி இணைந்து நகரத்தை விழாக்கோலத்தில் மிதக்கச் செய்தன.நாடியா (மேற்கு வங்காளம்): பெண்கள் பாரம்பரிய மண் விளக்குகளை அழகிய ரங்கோலி வடிவங்களில் ஒழுங்குபடுத்தி தீபாவளி திருவிழாவை சிறப்பித்தனர். ஒளியும் நிறங்களும் இணைந்த அற்புதக் காட்சியாக நகரம் மிளிர்ந்தது.அயோத்தி (உத்தரப் பிரதேசம்): சரயு நதிக்கரையில் நடைபெற்ற 'தீபோத்சவ் 2025' விழா உலகமே கவனித்த பெருவிழாவாக அமைந்தது. ஆயிரக்கணக்கான மண் விளக்குகள் ஏற்றப்பட்ட ராம் கி பெய்டி பகுதி விண்ணிலிருந்து பார்த்தபோது ஒளியின் கடலாக மின்னியது. நதிக்கரை அருகே வானத்தை அலங்கரித்த பட்டாசுகளும், பாலம் முழுவதும் மின்னும் ஒளியாலும், அயோத்தி மாய நகரமாக மாறியது.வராணாசி: கங்கை நதிக்கரையிலுள்ள அசி காட் பகுதியில் பண்டிதர்கள் பிரம்மாண்டமான மஹா ஆரத்தி நிகழ்ச்சியை நடத்தினர். ஆயிரக்கணக்கான தீபங்கள் நதிக்கரையையும் வானத்தையும் ஒளிரச்செய்தன. அதேவேளை, மாணவர்கள் தங்களது கல்வி நிலையங்களில் மண் விளக்குகள் ஏற்றி ஒளி திருநாளை கொண்டாடினர்.பிரதமர் மோடி ஒவ்வொரு வருடமும் ராணுவத்தினருடன் தீபாவளியை கொண்டாடுவதை வழக்கமாக கொண்டுள்ளார்.கோவா கடற்கரை அருகில்: பிரதமர் நரேந்திர மோடி தனது தீபாவளியை நாட்டின் கடற்படை வீரர்களுடன் மகிழ்வுடன் கொண்டாடினார். ஐ.என்.எஸ் விக்ராந்த் போர்க்கப்பலில் கடற்படை வீரர்களுக்கு இனிப்புகள் வழங்கி வாழ்த்திய அவர், நாட்டை காக்கும் வீரர்களுக்கான நன்றியை வெளிப்படுத்தினார்.ஸ்ரீநகர் (ஜம்மு & காஷ்மீர்): லால் சௌக்கில் மக்கள் மண் விளக்குகள் ஏற்றி நகரத்தை ஒளியால் அலங்கரித்தனர். பனிசூழ்ந்த பள்ளத்தாக்கு ஒளி புன்னகையால் துளிர்த்தது.அகார்தலா (திரிபுரா): இந்திய-வங்கதேச எல்லையான அகௌராவில் எல்லை பாதுகாப்புப் படை வீரர்கள் தீபம் ஏற்றி தீபாவளியை கொண்டாடினர். எல்லையிலும் ஒற்றுமையும் ஒளியும் பிரதிபலித்தன.

ஜெய்ப்பூர் : ஸ்வாமிநாராயண அக்ஷர்தாம் கோவில் ஒளியால் மிளிர்ந்தது. ஜெய்ப்பூரில் உள்ள கோவில் முழுவதும் ஆயிரக்கணக்கான விளக்குகள் ஏற்றப்பட்டு மின்னும் காட்சியாக மாறியது.

ஒவ்வொரு மாநிலத்திலும், ஒவ்வொரு நகரத்திலும் — மக்கள் ஒரே உணர்வுடன், ஒளி, மகிழ்ச்சி, அன்பு, நம்பிக்கை ஆகியவற்றை பகிர்ந்து கொண்டனர். தீபாவளி 2025, இந்தியாவின் பல்வகை கலாச்சாரங்களையும் ஒரே ஒளியில் இணைத்த ஒற்றுமை திருவிழாவாக திகழ்ந்தது.-எல்.முருகராஜ்