காங்கிரஸ் தேசிய தலைவராக மல்லிகார்ஜுன கார்கே இருந்தாலும், முக்கிய முடிவுகளை எடுப்பது ராகுல் தான். ஆனால், கட்சி நிர்வாகிகள் யாரும், ராகுலை அவ்வளவு எளிதாக அணுகிவிட முடியாது.

கட்சியின் பொதுச்செயலரான வேணுகோபாலின் அனுமதி பெற்று தான் ராகுலை சந்திக்க முடியும். காங்கிரசின் அதிகார மையமாகவும் வேணுகோபால் திகழ்கிறார்.

தேர்தலில் போட்டியிட, 'சீட்' கேட்பது, கட்சியில் பதவி பெறுவது போன்றவற்றுக்காக, நாடு முழுதும் உள்ள காங்கிரஸ் நிர்வாகிகள், டில்லியில் உள்ள வேணுகோபால் வீட்டில் திரள்வது வழக்கம்.

இந்நிலையில், சமீபத்தில் பீஹார் சட்டசபை தேர்தலில் காங்கிரசுக்கு ஏற்பட்ட படுதோல்வியால், வேணுகோபாலுக்கு எதிராக, மூத்த நிர்வாகிகள் போர்க்கொடி துாக்கியுள்ளனர்.

'கடந்த இரண்டு லோக்சபா தேர்தல்கள், அதன்பின் நடந்த பல மாநில சட்டசபை தேர்தல்கள் என, தொடர் தோல்விகளை கட்சி சந்தித்து வருகிறது. கட்சித் தலைவர்களை, வேணுகோபால் தவறாக வழி நடத்துகிறார்; அவரை முதலில் பதவியில் இருந்து துாக்குங்கள்...' என, மூத்த நிர்வாகிகள் பலரும், ராகுலுக்கு வேண்டுகோள் விடுத்துள்ளனர்.

இதனால், பதவி பறிபோகுமோ என்ற கலக்கத்தில் உள்ளார், வேணுகோபால்.