தியானத்தின் வலிமை

மனதை கட்டுப்படுத்துவதற்கு தியானம் முக்கிய பங்கு வகிக்கிறது என வலியுறுத்தப்படுகிறது. இந்நிலையில் குறைந்தது ஐந்து நிமிடம் ஆழ்ந்த தியானம் செய்வது ஒருவரின் கற்றல், அறிவாற்றல் திறனை மேம்படுத்த உதவுகிறது என பிரிட்டனின் அபர்தீன் பல்கலை ஆய்வு தெரிவித்துள்ளது. முந்தைய ஆய்வில் தியானம் மேற்கொள்வது, மேம்பட்ட அறிவாற்றல், உணர்ச்சியை கட்டுப்படுத்துதல், மன அழுத்தம் குறைதல் உள்ளிட்ட நன்மைகளை வழங்குவது கண்டறியப்பட்டிருந்தது. பல்வேறு கல்வித்தகுதி கொண்ட 60 பேர் இரு குழுவாக பிரித்து ஆய்வு எடுக்கப்பட்டதில் கண்டறியப்பட்டது.

தகவல் சுரங்கம்

உலக நுகர்வோர் தினம்

நுகர்வோர் பாதுகாப்பு, உரிமைகளை பெற்றிடவும், விழப்புணர்வு ஏற்படுத்தவும் 1983 முதல் மார்ச் 15ல் உலக நுகர்வோர் உரிமை தினம் கடைபிடிக்கப்படுகிறது. சர்வதேச நுகர்வோர் அமைப்பு 1960ல் உருவாக்கப்பட்டது. இதில் 120 நாடுகள் உறுப்பினர்களாக உள்ளன. 1962ல் அமெரிக்க அதிபர் ஜான் கென்னடி, நுகர்வோரின் முக்கியத்துவம் குறித்து முதன்முதலில் வலியுறுத்தினார். 'நுகர்வோருக்கு நியாயமான, பொறுப்பான ஏ.ஐ.,' என்பது இந்தாண்டு மையக்கருத்து. நுகர்வோர் உரிமைகள் என்பது வாங்கும் பொருளின் தரம், விலை, பாதுகாப்பு உள்ளிட்ட விஷயங்களை தெரிந்து கொள்வது.