டவுட் தனபாலு: இனி, கொரோனா எந்த வகையில உருமாறி வந்தாலும், நம்ம மக்கள் கலங்க மாட்டாங்க... ஆனா, கொசுக்களால உருவாகும் டெங்கு, மலேரியா போன்ற காய்ச்சல்களை கண்டுதான் பயப்படுறாங்க... அதனால நீங்க டெங்கு, மலேரியாவை கட்டுப்படுத்த நடவடிக்கை எடுத்தா, 'டவுட்'டே இல்லாம தங்களை பாராட்டலாம்!



அ.தி.மு.க., முன்னாள் அமைச்சர் வேலுமணி: கபட நாடகம் ஆடுதல், இரட்டை வேடம் போடுதல், உண்ட வீட்டிற்கே துரோகம் செய்தல், நம்பி ஓட்டளித்த மக்களுக்கு துரோகம் இழைத்தல் போன்ற செயல்கள், தி.மு.க.,வினருக்கு கைவந்த கலை. இதை, தமிழக மக்கள் நன்கு உணர்ந்துள்ளனர்.

டவுட் தனபாலு: ஏற்றி விட்ட ஏணியை எட்டி உதைக்கிறது, பதவி தந்தவங்களையே கட்சியில இருந்து துாக்கி வீசுறது எல்லாம் உங்க கட்சியிலயும் நடந்திருக்குதே... அதை எல்லாம் தி.மு.க.,வினர் திருப்பி போட்டு தாக்குனா, உங்களால பதில் தர முடியுமா என்ற, 'டவுட்' எழுதே!



மருத்துவம் மற்றும் ஊரக நலப்பணிகள் இயக்குனர் இளங்கோ மகேஸ்வரன்: 'யு டியூபர்' இர்பான், முறைப்படி மன்னிப்பு கடிதம் வழங்கியுள்ளார். அவர், இந்தியாவில் கருவில் இருப்பது ஆணா, பெண்ணா என்பது குறித்து பரிசோதனை செய்யவில்லை. அதனால், எந்த மாதிரியான சட்ட நடவடிக்கை எடுப்பது என்பது குறித்து, சட்ட வல்லுனர்களுடன் ஆலோசிக்கப்படும்.

டவுட் தனபாலு: எது, எதைத்தான் யு டியூப்ல போடுறது என்ற விவஸ்தை இல்லாம போயிட்டு இருக்குது... இர்பான் மாதிரி ஆட்களை மன்னிப்பு கடிதம் மட்டும் வாங்கிட்டு விடாம, கடும் நடவடிக்கை எடுத்தால் தான், யு டியூபர்கள் அட்ராசிட்டிக்கு ஒரு முடிவு வரும் என்பதில், 'டவுட்'டே இல்லை!

