டவுட் தனபாலு: நடிகர் வடிவேலு காமெடி போல, 'ஓப்பனிங் எல்லாம் நல்லாத் தான் இருக்கு... ஆனா, பினிஷிங் சரியில்லையே' என்பது மாதிரி, தேர்தல் அறிக்கை எல்லாம் பக்காவா தயாரிக்குறீங்க... ஆனா, அதை அமல் படுத்துறதுல தான், 'கோட்டை' விட்டுடுறீங்க என்பதில், 'டவுட்'டே இல்லை!



சிவகங்கை காங்., - எம்.பி.,கார்த்தி: எம்.பி.,க்கு பெரிய அளவில் அதிகாரம் இல்லை என்றாலும், என்னால் முடிந்த அளவு, ஆறு சட்டசபை தொகுதிகளுக்கும் நிதியை சமமாக பகிர்ந்து நலத்திட்ட உதவிகளை செய்துள்ளேன். வெளிநாடுகளில் உள்ள இந்தியர்களுக்கு ஓட்டுரிமை அளிக்க வேண்டும் என்று மசோதா தாக்கல் செய்துள்ளேன்.

டவுட் தனபாலு: எம்.பி., க்களுக்கு பெரிதாக எந்த அதிகாரமும் இல்லை என சொல்றீங்களே... அதனால, வர்ற லோக்சபா தேர்தல்ல சிவகங்கை சீட் எனக்கு வேண்டாம்னு மறுத்தால், 'டவுட்'டே இல்லாம தங்களை பாராட்டலாம்!



வேலுார் வி.ஐ.டி., பல்கலைக் கழக வேந்தர் விஸ்வநாதன்: ஊழலுக்கு முதல் காரணம், தேர்தலில் அரசியல்வாதிகள் பணம் கொடுப்பதும், மக்கள் பணம் வாங்குவதும் தான். கேரளாவில் எந்த கட்சியும் மக்களுக்கு பணம் கொடுப்பது கிடையாது. அதுபோல இங்கும் பணம் கொடுக்கக்கூடாது. அந்த நிலை ஏற்பட்டால் தான் நாடு முன்னேறும்.

டவுட் தனபாலு: தமிழகத்துல, ஓட்டுக்கு பணம் கொடுப்பதற்கு முன்பு, லட்சங்களில் தான் ஊழல் செய்தாங்க... எப்ப, ஓட்டுக்கு பணம் கொடுக்கிற கலாசாரத்தை அரசியல்வாதிகள் ஆரம்பிச்சாங்களோ, அப்ப இருந்து அவங்க பண்ற ஊழல்களும் கோடிகள்ல மாறிடுச்சு என்பதில், 'டவுட்'டே இல்லை!

