டவுட் தனபாலு: காங்கிரஸ்ல இருந்து பா.ஜ.,வில் சேர்ந்த விஜயதரணி எம்.எல்.ஏ.,வின் ராஜினாமா கடிதத்தை உடனே ஏத்துக்கிட்டு, அந்த தொகுதி காலியா இருப்பதாக சபாநாயகர்அறிவிச்சாரே... பொன்முடி விஷயத்துல மட்டும் மவுனமாக இருப்பது, அவரது நிடுநிலை மீது, 'டவுட்'களை கிளப்பாதா?

அ.தி.மு.க., முன்னாள் அமைச்சர் விஸ்வநாதன்: தமிழகத்தின் ஒட்டுமொத்த பிரச்னைகளை எதிரொலிக்கும் வகையில், எங்கள் கட்சியின் தேர்தல் அறிக்கை இருக்கும்; மத்திய, மாநில அரசுக்கு வழிகாட்டியாகவும் அமையும். அ.தி.மு.க., தேர்தல் அறிக்கை, தேர்தலில் பேசுபொருளாக, 'சுப்ரீம் ஹீரோ'வாக இருக்கும்.

டவுட் தனபாலு: தேர்தல் அறிக்கையில, நீங்க ஆயிரம் வாக்குறுதிகளை அள்ளிவிடலாம்... ஆனா, சட்டசபை தேர்தலா இருந்தாலாவது, 'இவங்க ஆட்சிக்கு வந்தா, இதை எல்லாம் நிறைவேற்றுவாங்க'ன்னு மக்கள் நம்புவாங்க... நடக்க போறது, லோக்சபா தேர்தல் என்பதால, உங்க வாக்குறுதிகளை நம்புவாங்களா என்பது, 'டவுட்'தான்!

பத்திரிகை செய்தி: லோக்சபா தேர்தலில் தமிழகத்தில் உள்ள, 39 தொகுதிகளிலும், புதுச்சேரி லோக்சபா தொகுதியிலும், அ.தி.மு.க., சார்பில் போட்டியிட விரும்புவோரிடம், பிப்., 21 முதல், அ.தி.மு.க., தலைமை அலுவலகத்தில் விருப்ப மனு பெறப்படுவதாக அறிவிக்கப்பட்டது. இதற்கான கால அவகாசம், வரும் 6ம் தேதி மாலை 5:00 மணி வரை நீட்டிக்கப்பட்டுள்ளது.

டவுட் தனபாலு: எதிர்பார்த்த அளவுக்கு விண்ணப்பங்கள் விற்பனை நடக்கலையா அல்லது கட்சியினரிடம் இருந்து கால அவகாசத்தை நீட்டிக்கணும்னு கோரிக்கை வந்துச்சான்னு தெரியலையே... என்னதான் கால நீட்டிப்பு தந்தாலும், ஜெ., காலத்துல இருந்த போட்டா போட்டி இப்ப இருக்குமா என்பது, 'டவுட்'தான்!