டவுட் தனபாலு: அது சரி... அடுத்த ஆண்டு சட்டசபை தேர்த லில், அ.தி.மு.க., ஆளுங்கட்சியாகிட்டால், 'நீட் தேர்வை ரத்து பண்ண சொல்லி, எதிர்க்கட்சிகள் நெருக்கடி தரும்... 'அதெல்லாம் முடியாது'ன்னு சொல்றதுக்கு இப்பவே தயாராகுறீங்க என்பது, 'டவுட்'டே இல்லாம தெரியுது!



பத்திரிகை செய்தி: தேர்தலுக்கு தேர்தல் புதுப்புது உத்திகளை கண்டுபிடித்து ஓட்டுகளை குவிக்கும் தி.மு.க., அடுத்த ஆண்டு நடக்க இருக்கும் சட்டசபை தேர்தலுக்கு அபாரமான திட்டத்தை தயாரித்துள்ளது. மேல்மட்டம் முதல் கீழ்மட்டம் வரையுள்ள கட்சி நிர்வாகிகள், தாங்கள் வசிக்கும் பகுதியில் நடக்கும் காது குத்து, மஞ்சள் நீராட்டு, திருமணம் போன்ற எந்த நிகழ்ச்சியாக இருந்தாலும், கட்டாயம் ஆஜராகி வாழ்த்து தெரிவித்து, கைநிறைய மொய் எழுதுமாறு, தி.மு.க., தலைமை அறிவுறுத்தி உள்ளது.

டவுட் தனபாலு: அது சரி... எங்க மாவிலை கட்டியிருந்தாலும், அழைப்பே இல்லாம ஆஜராகி, தேர்தல் நேரத்துல வாக்காளர்களுக்கு பண்ற பட்டுவாடாவை இப்பவே அட்வான்சா கொடுக்கச் சொல்றாங்களோ... ஆளுங்கட்சியினரின் மொய்யை எதிர்பார்த்தே, தமிழகம் முழுக்க விழாக்கள் களைகட்டும் என்பதில், 'டவுட்'டே இல்லை!



மா.கம்யூ., மாநில செயலர் சண்முகம்: தி.மு.க., அரசில், நான்கு ஆண்டுகளாக நிறைவேற்றப்படாத வாக்குறுதியால் மக்கள் அதிருப்தியில் இருக்கின்றனர். அந்த வாக்குறுதிகளை நிறைவேற்றுவது தான், 2026ல் மக்களை சந்திக்க ஒரே வழி. தி.மு.க., கூட்டணி ஏற்கனவே வலுவான கூட்டணி தான். எஞ்சி இருக்கக்கூடிய வாக்குறுதிகளை நிறைவேற்றக்கூடியதும் மிகவும் முக்கியம்.

டவுட் தனபாலு: என்ன தான் கூட்டணி பலமாக இருந்தாலும், வாக்குறுதிகளை நிறைவேற்றாத அதிருப்தி மக்கள் மத்தியில் அதிகமா இருக்கு... குறிப்பா, பழைய பென்ஷன் திட்டம் கிடைக்காத அரசு ஊழியர்கள், ஆசிரியர்கள் தரப்பு ஓட்டுகள், உங்க கூட்டணிக்கு வேட்டு வச்சிடும்னு நீங்க பயப்படுவது, 'டவுட்'டே இல்லாம தெரியுது!

