டவுட் தனபாலு: பண்டிகை நாட்களில் தாராளமா மது குடித்து செலவழிக்கவும், சினிமா பார்க்கவும் தானே இலவசங்களை வாரி விடுறாங்க... அரசு ஒருபக்கம் இலவசமாக தருவது, மறுபடியும் அவங்க கஜானாவுக்கே கலால் வரி, கேளிக்கை வரியா வந்துடும் என்பதில், 'டவுட்'டே இல்லை!

அகில இந்திய காங்., செயலர் நிவேதித் ஆல்வா: தி.மு.க.,வுடன் சுமுகமாக பேச்சு நடத்தி, காங்கிரசுக்கு 28 சட்டசபை தொகுதிகளை பெற்றுள்ளோம். எங்களுக்குள் எந்த குழப்பமும் இல்லை. இதனால், எங்கள் கூட்டணியை பார்த்து, அ.தி.மு.க., பொதுச்செயலர் பழனிசாமி பொறாமையில் இருக்கிறார்.

- டவுட் தனபாலு: தி.மு.க., 25 சீட்கள் தருவதாக சொல்லி, நீங்க கடும் போராட்டம் நடத்தி, மூணு சீட்களை மட்டும் தான் கூடுதலா வாங்கியிருக்கீங்க... ஆனாலும், நீங்க நடத்திய கறார் பேரத்தை, தி.மு.க.,வினர் யாரும் லேசுல மறக்க மாட்டாங்க... அதனால, 28 இடங்கள்லயும் நீங்க வெற்றி பெற, தி.மு.க.,வினர் முழுமூச்சா வேலை செய்வாங்களா என்பது, 'டவுட்'தான்!

பத்திரிகை செய்தி: 'த.வெ.க., தலைவர் விஜய், அ.தி.மு.க., - பா.ஜ., கூட்டணியில் இணைய வேண்டும்' என, தமிழக பா.ஜ., செய்தி தொடர்பாளர் பிரசாத் அறிக்கை வெளியிட்டிருந்தார். 'த.வெ.க., உடன் பேச்சு நடத்தவில்லை' என, தமிழக பா.ஜ., தலைவர் நயினார் நாகேந்திரன் கூறியிருந்த நிலையில், பிரசாத் கருத்து அதற்கு எதிர்மறையாக இருந்தது. இதனால், செய்தி தொடர்பாளர் மற்றும் தேர்தல் பணி குழு பொறுப்பு ஆகியவற்றில் இருந்து, பிரசாத்தை, நயினார் நாகேந்திரன் நீக்கியுள்ளார்.

டவுட் தனபாலு: அரசியல் வரலாற்றில், 'கூட்டணியை விட்டு வெளியே போங்க'ன்னு சொன்னவங்க பதவிகளை பறிச்சுதான் பார்த்திருக்கோம்... இங்க என்னடான்னா, கூட்டணிக்கு கூப்பிட்டதுக்கே பதவியை பறிச்சுட்டாங்களே... 'தி.மு.க.,வே மீண்டும் ஆட்சிக்கு வரணும்'னு தமிழக பா.ஜ.,வில், 'ஸ்லீப்பர் செல்'களா யாரும் செயல்படுறாங்களோ என்ற, 'டவுட்'தான் வருது!