டவுட் தனபாலு: விஜயின் செல்வாக்கு இவ்வளவு தான்னு இப்ப சொல்றீங்களே... அப்படியிருந்தும், அவரை தே.ஜ., கூட்டணியில் சேர்க்க, உங்க கட்சி தரப்பில் கடைசி வரை கடும் முயற்சிகளை எடுத்தது ஏன் என்ற, 'டவுட்' வருதே!

lll

தமிழக பா.ஜ., தலைவர் நயினார் நாகேந்திரன்: தி.மு.க., ஆட்சியில், சொத்து வரி, மின் கட்டணம் கடுமையாக உயர்ந்துள்ளது. மாதந்தோறும் மின் கட்டணம் வசூலிப்பதாக கூறிய வாக்குறுதியை நிறைவேற்றவில்லை. தி.மு.க., தேர்தல் அறிக்கையை வழக்கமாக, 'ஹீரோ, ஹீரோயின்' என கூறுவர்; ஆனால், இந்த முறை அது, 'ஹெராயின்' போன்று உள்ளது.

டவுட் தனபாலு: 'ஹெராயின்' பயங்கரமான போதை பொருள்... 'அதை பயன்படுத்தியவங்க, தன்னிலை மறந்துடுவாங்க'ன்னு மருத்துவர்கள் சொல்வாங்க... அந்த வகையில், தி.மு.க., தேர்தல் வாக்குறுதிகளில் மக்களும் மயங்கி, அவங்களுக்கே ஓட்டு போட்டுட்டா, தே.ஜ., கூட்டணி வெற்றிக்கு சிக்கலாகிடும் என்பதில், 'டவுட்'டே இல்லை!

lll

உசிலம்பட்டி தொகுதி அ.தி.மு.க., - எம்.எல்.ஏ.,வாக இருந்து, ஓ.பன்னீர்செல்வத்துடன், தி.மு.க.,வில் இணைந்த அய்யப்பன்: கடைசி வரை கூடவே இருந்த எனக்கு பன்னீர்செல்வம் கை கொடுப்பார் என நம்பினேன். தி.மு.க.,வில் இணையும் போது உசிலம்பட்டி தொகுதியில் மீண்டும் வாய்ப்பு அளிக்க வேண்டும் என, கேட்டேன்; அவரும் சம்மதித்தார். எம்.எல்.ஏ.,வாக இருந்து, தி.மு.க.,வில் இணைந்த வைத்திலிங்கம், மனோஜ் பாண்டியன் ஆகியோருக்கு மீண்டும் சீட் கொடுத்துள்ளனர். ஆனால், எனக்கு சீட் தராமல், காங்கிரசுக்கு உசிலம்பட்டி ஒதுக்கப்பட்டது. ஒரு கேப்டனாக, தொண்டனை கரை சேர்க்க, பன்னீர்செல்வம் தவறி விட்டார்.

- டவுட் தனபாலு: மனோஜ் பாண்டியன், வைத்திலிங்கம் எல்லாம், பன்னீருக்கு முன்னாடியே தி.மு.க.,வுக்கு போய் தொகுதிகளை முன்பதிவு பண்ணிட்டாங்க... நீங்க பன்னீரோடு பந்தாவா போய் சேர்ந்தது தான், உங்க சீட் கனவுக்கு வேட்டு வச்சிடுச்சு என்பதில், 'டவுட்'டே இல்லை!

lll