டவுட் தனபாலு: அது சரி... 8 சதவீதமா இருந்த உங்க கட்சியின் ஓட்டு வங்கி, இந்த சட்டசபை தேர்தலில், 4 சதவீதமா சரிஞ்சிடுச்சு... உள்ளாட்சி தேர்தல், லோக்சபா தேர்தலிலும் தனித்து களம் கண்டு, இதை இன்னும் கீழே கொண்டு போகாம விட மாட்டேன்னு சபதம் ஏதும் போட்டிருக்கீங்களோ என்ற, 'டவுட்'தான் வருது!

மா.கம்யூ., கட்சி மாநில செயலர் சண்முகம்: அ.திமு.க., மற்றும் தி.மு.க.,விற்கு எதிராகத் தான், த.வெ.க.,விற்கு மக்கள் ஓட்டு போட்டுள்ளனர். த.வெ.க., அமைச்சரவையில், அ.தி.மு.க.,வின் வேலுமணி அணியை சேர்த்து கொள்வது என்பது, மக்கள் தீர்ப்புக்கு எதிரானது. அந்த நிலைக்கு த.வெ.க., செல்லாது என நம்புகிறோம். அ.தி.மு.க., ஆதரவை அவர்கள் பெற்றால், எங்கள் முடிவை மறுபரிசீலனை செய்ய நேரிடும்.

டவுட் தனபாலு: உங்க கட்சியின் ரெண்டு எம்.எல்.ஏ.,க்கள், தி.மு.க., கூட்டணியில் நின்னு ஜெயிச்சிருக்காங்களே... அவங்க , விஜய் எதிர்ப்பு ஓட்டுகளால தான் ஜெயிச்சிருக்காங்க... அப்படியிருந்தும், விஜய் அரசுக்கு நீங்க ஆதரவு தருவது மக்கள் தீர்ப்புக்கு எதிரானது இல்லையா என்ற, 'டவுட்' வருதே!

தமிழக பா.ஜ., தலைமை செய்தி தொடர்பாளர் நாராயணன் திருப்பதி: கடந்த லோக்சபா தேர்தலில், 23 தொகுதிகளில் பா.ஜ., போட்டியிட்டது. அந்த தொகுதிகளில் பதிவான மொத்த ஓட்டுகள், 2.50 கோடி. அதில், பா.ஜ., பெற்ற ஓட்டுகள், 49.18 லட்சம்; இதன் சராசரி, 19.62 சதவீதம். இந்த சட்டசபை தேர்தலில், பா.ஜ., 27 இடங்கள், தாமரை சின்னத்தில் கூட்டணி கட்சிகள் போட்டியிட்ட ஆறு என, மொத்தம் 33 தொகுதிகளில் போட்டியிட்டோம். அந்த தொகுதிகளில், மொத்தம் பதிவான 66.03 லட்சம் ஓட்டுகளில், பா.ஜ.,வுக்கு 14.67 லட்சம் ஓட்டுகள் கிடைத்தன; இதன் சராசரி, 22.22 சதவீதம். அதாவது, 2024 லோக்சபா தேர்தலை விட, இந்த தேர்தலில் பா.ஜ., அதிக ஓட்டுகளை வாங்கி உள்ளது.

டவுட் தனபாலு: ஜனநாயகத்துல ஒரு ஓட்டில் தோற்றாலும் தோல்வி, தோல்வி தான்... 33 தொகுதிகள்ல போட்டியிட்டு, ஒரே ஒரு இடத்தில் மட்டும் ஜெயிச்சிட்டு, இந்த மாதிரி புள்ளி விபரங்களை அடுக்கி, உங்களுக்கு நீங்களே ஆறுதல் தேடிக்கிறீங்க என்பது, 'டவுட்' இல்லாம தெரியுது!