டவுட் தனபாலு: கிண்டி காந்தி மண்டபம் என்பது, தமிழகத்தின் அடையாள சின்னம்... ஒருவேளை, நீங்க கோரிக்கை வைக்காமல் இருந்திருந்தாலே, காந்தி மண்டபத்தில் நினைவு தின நிகழ்ச்சியை நடத்தியிருப்பாங்களோ என்ற, 'டவுட்'தான் வருது!



நாம் தமிழர் கட்சி ஒருங்கிணைப்பாளர் சீமான் அறிக்கை: சென்னை, கிழக்கு கடற்கரை சாலையில், நள்ளிரவில் காரில் பயணித்த பெண்களை, தி.மு.க., கொடி கட்டிய காரில் பயணித்த சிலர், குடிபோதையில் வழிமறித்து மிரட்டியுள்ளனர். அப்பெண்களை தாக்க வந்ததோடு, உயிருக்கு ஆபத்து விளைவிக்கும் வகையில், வீடு வரை துரத்திச் சென்ற காட்சிகள், நெஞ்சை பதற செய்கின்றன.

டவுட் தனபாலு: 'இந்தியாவிலேயே பெண்களுக்கு பாதுகாப்பான மாநிலம் தமிழகம்' என, ஆளுங்கட்சியினர் பெருமை அடிச்சுக்குறாங்களே... ஆனா, வடமாநிலங்களை விட மோசமான நிலைக்கு, தமிழகத்தின் சட்டம் - ஒழுங்கு போயிட்டு இருக்கு என்பதற்கு இதுபோன்ற சம்பவங்களே சாட்சி என்பதில், 'டவுட்'டே இல்லை!



வி.சி., கட்சி தலைவர் திருமாவளவன்: சென்னை ஈ.சி.ஆர்., பகுதியில் இளம்பெண்கள் வந்தகாரை, தி.மு.க., கொடி கட்டிய காரில் வந்த இளைஞர்கள், கும்பலாக துரத்திய சம்பவத்தில், காரில் கட்சிக்கொடி கட்டப்பட்டிருப்பதாலேயே, அவர்கள் தி.மு.க.,வினர் என்ற முடிவுக்கு வந்துவிட முடியாது. மாற்று கட்சியினரும் கூட தி.மு.க., கொடி கட்டி சென்றிருக்கக் கூடுமே.

டவுட் தனபாலு: இப்படி எல்லாம் மறுப்பு தெரிவிக்கலாம்னு தி.மு.க.,வினரே யோசனை பண்ணியிருப்பாங்களா என்பது, 'டவுட்'தான்... தி.மு.க.,வுக்கு விழுந்து விழுந்து வக்காலத்து வாங்குறதுல காங்., தலைவர்களுக்கும், உங்களுக்கும் கடும் போட்டியே நடக்குதோ என்ற, 'டவுட்'டும் கூடவே வருது!

