வடகிழக்கு மாநிலமான மேகாலயாவின் ரி-போய் மாவட்டம் தத்ராங் உம்ன்கெம் கிராமத்தைச் சேர்ந்தவர் ஷடாப். குடும்பத்தின் பொருளாதார சூழல் காரணமாக 1989ல் பள்ளிப் படிப்பை நிறுத்தினார். குடும்பத்தை கவனிப்பதற்காக கல்வியை கைவிட்டாலும், படிப்பை முடிக்க வேண்டும் என்ற ஆசை அவருக்குள் தொடர்ந்து இருந்தது.

இந்நிலையில், பள்ளிப் படிப்பை இடையில் நிறுத்தியவர்களுக்கு மீண்டும் கல்வி கற்க வாய்ப்பு அளிக்கும் மேகாலயா அரசின், 'மீண்டும் கல்வி கற்கும் திட்டம்' ஷடாப்புக்கு புதிய வாய்ப்பை வழங்கியுள்ளது. இந்த திட்டத்தின் கீழ், வயது வரம்பின்றி 10ம் வகுப்பு படிப்பை முடித்து தேர்வு எழுத முடியும்.

இந்த ஆண்டு இத்திட்டத்தின் கீழ் மேகாலயா முழுவதும் பள்ளி இடைநிற்றல் மாணவர்கள் 9,767 பேர் தனித்தேர்வர்களாக பதிவு செய்துள்ளனர். இவர்களில் அதிக வயதுடையவர் ஷடாப். மேகாலயா பள்ளிக் கல்வி வாரியம் மற்றும், 'எம்பவர்' அமைப்பு இணைந்து இந்த இரண்டாவது வாய்ப்பு கல்வித் திட்டத்தை செயல்படுத்துகின்றன.