பான் கார்டு!

வருமான வரித்துறையில் நிரந்தர கணக்கு எண் என்ற, 'பான் கார்டு' எழுத்து, எண்களை கொண்ட குறியீடு அட்டை. இந்த எண் நிரந்தரமானது.

முகவரி மாறினாலோ, வேறு மாநிலத்திற்கு சென்றாலோ இந்த எண் மாறாது. வெளிநாட்டில் வசிக்கும் இந்தியர், இந்தியாவில் பரிவர்த்தனையில் ஈடுபட நிரந்தர கணக்கு எண் அவசியம்.

மத்திய அரசின் கட்டுப்பாட்டில் உள்ள என்.எஸ்.டி.எல்., என்ற அமைப்பு, பான் எண்ணை வழங்குகிறது. இதன் மூலம் வங்கி, பணம், வரி பரிவர்த்தனை, கடன், முதலீடு நடவடிக்கைகளை கண்காணிக்கிறது மத்திய அரசு. வரி ஏய்ப்பு தடுக்கப்படும்.

இது அடையாள ஆவணமாகவும் பயன்படுகிறது. தனிநபர் அல்லது நிறுவனம், குடும்ப அமைப்பு என எந்த பெயரில் வேண்டுமானாலும், பான் எண் வாங்கலாம்.

ஒருவர் பெயரில் அல்லது ஒரு நிறுவனம் பெயரில் வாங்கிய பான் கார்டை, வேறொருவருக்கு மாற்ற முடியாது.

பான் கார்டு வழங்கும் முறை மிக துல்லியமானது. தவறான தகவல்கள், ஆவணங்கள் கொடுக்க முயன்றால் சட்டப்படி குற்றமாக கருதப்படும்.

* பான் எண் வாங்க வயது வரம்பு கிடையாது

* வருமான வரி செலுத்த வேண்டும் என்ற அவசியம் இல்லை

* ஒரு நிறுவனத்தில் பணியாற்ற வேண்டும் என்ற தேவையும் இல்லை.

ஆதார் அடையாள அட்டை போல, அரசு அமைப்பு வழங்கும் வரிக்கணக்கு எண் இது. பிறந்த குழந்தைக்குக்கூட வாங்க முடியும். ஆனால் குறிப்பிட்ட வயது வரம்பை எட்டும் வரை பெற்றோர் அல்லது பாதுகாவலர் அதற்கு பொறுப்பேற்க வேண்டும்.

துளசி பலன்!

துளசி, மருத்துவ குணம் நிறைந்த மூலிகை செடி. இதில், நல்துளசி, கருந்துளசி, செந்துளசி, கல்துளசி, முள்துளசி, நாய்துளசி என பலவகை உண்டு. எல்லாமே மருத்துவ குணம் கொண்டவைதான். இலை, தண்டு, பூ, வேர் என செடியின் அனைத்து பாகங்களும் பயன் தரும்.

தமிழகத்தில் தானாக வளர்ந்து கிடக்கிறது.

துளசியின் தாயகம் இந்தியா. அந்தமான் மற்றும் நிகோபர் தீவுகளிலும் காணப்படுகிறது.

மன இறுக்கம், நரம்பு கோளாறு, ஞாபக குறைவு, ஆஸ்துமா, இருமல் மற்றும் பிற தொண்டை நோய்களை குணமாக்கும் சக்தி துளசிக்கு உண்டு.

துளசி இலை சாறில் தேன், இஞ்சி கலந்தால், 'துளசி கஷாயம்' ஆகும். அந்த கஷாயத்தை சளி, இருமல் உள்ளவர்களுக்கு கொடுத்தால் நலம் கிடைக்கும்.

சரும நோய்களுக்கு துளசி சாறு சிறந்த நிவாரணி. இலையை சாறு எடுத்து, காலை, மாலையில் சாப்பிட்டு வந்தால் பசி அதிகரிக்கும். இதயம், கல்லீரலை பலப்படுத்தும்.

மழைக் காலத்தில் துளசி இலையை தேநீர் போல காய்ச்சிக் குடித்து வந்தால் மலேரியா, விஷக் காய்ச்சல் ஏற்படாது. துளசி இலை கஷாயம் குடித்தால் தொண்டைப் புண் குணமாகும்.

வீட்டுத் தோட்டத்தில் வளர்ப்போம், பச்சை வண்ண துளசி செடி.

- என்றென்றும் அன்புடன், அங்குராசு.