விழுப்புரம் மாவட்டம், திண்டிவனம், சிங்கனுார், அரசு ஆதிதிராவிடர் நல மேல்நிலைப் பள்ளியில், 2002ல், 12ம் வகுப்பு படித்த போது, விலங்கியல் ஆசிரியையாக விஜயலட்சுமி இருந்தார். பாடம் நடத்தும் போதெல்லாம், சக மாணவர்கள், அரட்டை அடித்து அட்டகாசம் செய்து வந்தனர்.

எதையும் மனதில் கொள்ளாமல் பணியை தவறாமல் செய்து வந்தார்; மாணவர்களின் அரட்டை போக்கு அதிகரித்தது.

ஒரு கட்டத்தில், 'உங்கள் வயதையும் தாண்டித்தான், 45 வயதை எட்டியிருக்கிறேன். என் பிள்ளைகளுக்கும், உங்கள் வயது தான் இருக்கும்; அதனால் தான், உங்களை மாணவர்களாக பார்க்காமல், சேயாக எண்ணி கண்டிக்காமல் விட்டு வருகிறேன்...' என்றார்.

தவறை உணர்ந்து மன்னிப்பு கேட்டவர்களிடம், 'தாயை போல என்னை நேசித்தால் போதும்...' என்றார். அன்றிலிருந்து அரட்டை அடிப்பதை அடியோடு நிறுத்தினர் மாணவர்கள்.

தற்போது, என் வயது, 37; அந்த ஆசிரியை ஜாடையில் யாரைப் பார்த்தாலும், அவர் காட்டிய பாசமே நினைவுக்கு வருகிறது.

- ரா.ராஜ்மோகன், விழுப்புரம்.