கோவை, ஆர்.எஸ்.புரம், ஆண்கள் உயர்நிலைப் பள்ளியில், 1960ல், 7ம் வகுப்பு படித்துக் கொண்டிருந்தேன்.

அன்று ஓவிய ஆசிரியர் வரதராஜன், கரும்பலகையில் ஓவியம் வரைந்து கொண்டிருந்தார்.

சாக்பீசால் போட்டக் கோடுகளை விலங்கு போல் மாற்றிக் கொண்டிருந்தார். அவர் கிறுக்கியதைக் கண்டு, பக்கத்தில் அமர்ந்திருந்தவனிடம், 'கிறுக்கு மாஸ்ட்டராக இருப்பார் போல...' என்று கூறி விட்டேன்.

இதை உடனடியாக அவரிடம் போட்டுக்கொடுத்து விட்டான். கடும் கோபத்தில் கன்னத்தில் ஓங்கி அறைந்தார். அடிவாங்கிய சூட்டுடன், 'கிறுக்கி வரைவதில் மாஸ்ட்டராக இருக்கிறீர் என்று தானே கூறினேன்...' என்றேன்.

அதை பொருட்டாக எடுத்துக் கொள்ளவில்லை. என்னை அலட்சியப் படுத்தினார். போட்டுக்கொடுத்தவன், 'இப்படி அடிப்பார் என்று நினைக்கவில்லை... என்னை மன்னித்து விடு...' என வருந்தினான்.

நேரம் சரி இல்லை என அதை கடந்தேன்.

இப்போது, என் வயது, 73; அந்த சம்பவத்தை நினைக்கும் போதெல்லாம் சிரித்து விடுகிறேன்!

- க.சதாசிவம், கோவை.