PUBLISHED ON : மே 06, 2012

மனதை அடக்கு, மனதைக் கட்டுப்படுத்து என்றெல்லாம் சொல்லியிருக்கின்றனர். நம்முடைய பாவ புண்ணியங்களுக்கும் காரணம் மனம் தான். மனதில் தோன்றுவது தான் எண்ணம். மனதில் தோன்றுவதை எப்படி செயல்படுத்தலாம் என்று ஆலோசனை செய்வது புத்தி. புத்தி, எப்படி செயல்படுத்துவது என்று தீர்மானம் செய்கிறது; அதை, அவயவங்கள் நிறைவேற்றுகின்றன. அதாவது, ஒரு காரியம் நடப்பதாக இருந்தால், மனம், புத்தி, அவயவம் இம்மூன்றும் இணைந்து செயல்பட வேண்டும்.
ஒருவருக்கு, கோவில் கட்ட வேண்டும் என்று தோன்றுகிறது. இது அவரது எண்ணம். இந்தக் கோவிலை எப்படி கட்டுவது, பணத்துக்கு என்ன செய்யலாம் என்று மனம் எண்ணுகிறது. அடுத்து புத்தி வேலை செய்கிறது. யார், யாரைப் பார்த்தால் பணம் கிடைக்கும், பத்திரிகை அடித்து வினியோகம் செய்தால் பணம் கிடைக்குமா என்றெல்லாம் ஆலோசனை வழங்குகிறது இந்த புத்தி. புத்தியின் ஆலோசனைப்படி அவயவங்கள் வேலை செய்கின்றன.
யாரைப் போய் பார்க்க வேண்டும் என்று புத்தி சொல்கிறதோ, அங்கெல்லாம் கால்கள் போகின் றன. கைகள் பத்திரிகையைக் கொடுக்கிறது. வாயும், நாக்கும் கோவில் கட்ட வேண்டியதன் அவசியத்தையும், அதனால் ஏற்படும் நன்மைகளையும் எடுத்துச் சொல்கிறது. இவர் இப்படி சொல்வதையெல்லாம், அவர் புத்தியில் ஏற்றுக் கொள்கிறார்.
அவருடைய மனமும் இதில் ஈடுபடுகிறது. அதற்கான முயற்சியில் ஈடுபடுகிறார். கோவில் கட்டி முடிந்து விடுகிறது. இதில் மனம், புத்தி, அவயவங்கள் மூன்றும் ஈடுபடுகின்றன. மனம் நல்லதை நினைக்கிறது. புத்தி அதை ஆமோதிக்கிறது. அவயவங்கள் அதை நிறைவேற்றுகின்றன. ஒருவர் கோவிலுக்கு போகலாம் என்று மனதில் நினைக்கிறார்; பேஷாகப் போகலாம்.
பிரதோஷ காலத்தில் பரமேஸ்வர தரிசனம் பெரிய புண்ணியம்; போய் வரலாம் என்று புத்தி சொல்கிறது. உடனே, கால்கள் கோவிலை நோக்கி நடக்க ஆரம்பிக்கின்றன. கோவிலுக்குப் போனதும், கண்கள் பகவானை தரிசிக்கின்றன, கைகள் பகவானை கும்பிடுகின்றன, வாயும், நாவும் பகவானின் ஸ்தோத்திரங்களை சொல்கின்றன. அவருக்கு பிரதோஷ காலத்தில் பரமேஸ்வரனை தரிசித்த புண்ணியம் கிடைக்கிறது. நற்கதிக்கு வழி பிறக்கிறது.
ஆக, இதற்கு மனம், புத்தி, அவயவங்கள் இம்மூன்றும் ஒன்று சேர்ந்து இயங்க வேண்டும்; இயங்கினால், நலம் பெறலாம் என்றனர். அதனால், ஒரு நல்ல காரியம் செய்வதற்கும், தவறான காரியம் செய்வதற்கும் முதலில், மனம் தான் காரணம்.
தவறான காரியங்களில் ஈடுபடாமலிருக்கும்படி மனதை அடக்கு, என்றனர் நம் முன்னோர்.
***
ஆன்மிக வினா-விடை!
தெய்வ தரிசனத்திற்காக கோவிலுக்கு செல்லும் போது, என்னென்ன கொண்டு செல்லலாம்?
தேங்காய், பழம், பூ, கற்பூரம், எண்ணெய், திரி என்று, அவரவர் சக்திக்கேற்றபடி, ஏதாவது ஒன்றை எடுத்துச் செல்லலாம். தேங்காய், பழம், பூ ஆகியவற்றை தண்ணீரில் கழுவி, முழங்காலுக்கு கீழே தொங்க விடாமல் எடுத்து செல்ல வேண்டும்.
***
வைரம் ராஜகோபால்
