PUBLISHED ON : செப் 23, 2012

சொல்லாமல் போகிறவர்கள்!
* எந்த வைபவங்களுக்கும்
பூக்களை
தங்கள் பெயர் சொல்லி
அனுப்பி வைப்பதில்லை
செடிகளும், கொடிகளும்!
* தன்னை
புண்ணியத் தீர்த்தமென்று
அழைக்காதவரை
நதி சுட்டெரிப்பதுமில்லை;
அவரது நிலங்களை
வறண்டு போக விடுவதுமில்லை!
* யார் பாராட்ட வேண்டுமென்று
எல்லாருக்காகவும்
சுழன்று கொண்டிருக்கிறது
பூமி?
* கல்வெட்டில் தன் பெயரை
எழுதி வைத்தவரை விட,
எழுதாமல் விட்டவர்கள்
எப்போதும்
நினைவில் நிற்கின்றனர்
எல்லா இதயங்களுக்குள்ளும்
'யார் அவர்கள்?' என்று!
* வெட்கத்திற்கு
உரியதாய் தோன்றுகிறது
புகழ் என்று நினைத்து
விளம்பரப்படுவது!
* தியாகி என்ற அடைமொழியும்
சுமையாகவே தெரிகிறது
பொதுநலத்தை
விரும்புகிறவருக்கு!
* சாதனைகளைச் செய்து விட்டு
தான் யாரென்று
சொல்லாமல் போகிறவரோடு
ஒப்பிடுகையில்
விருதுகள் பெற்றவரும்
வீழ்ந்து விடுகின்றனர்!
* வீணையாவதில்
பெருமை இருந்தாலும்
விறகாவதன்
மகத்துவம் அதிகமென்றே
தோன்றுகிறது
மரங்களுக்கு!
— கீர்த்தி, கொளத்தூர்.
