உன் விழிகள் மட்டும் விதிவிலக்கு...

* குருடனாகவாவது

பிறந்திருக்கலாம்...

உன் பார்வையாவது என்னை

படுத்தாதிருக்குமே!

* புல்லாங்குழலாகவாவது

ஜனித்திருக்கலாம்...

உன் மூச்சுக் காற்றுப் பட்டாவது

முன்னுக்கு வந்திருப்பேனே!

* ஒன்றை புரிந்து கொள்...

உன் காதலால்

நான் எழவும் முடியும்

என் இழவிலும் முடியும்!

* ஆயுதம் என்பது

கருணையற்றது தானே...

உன் விழிகள் மட்டும்

எப்படி விதிவிலக்கு?

* மதுவிலக்கு என்பது

கள்ளுக்கு உண்டு...

ஏனோ...

உன் கண்ணுக்கு இல்லை!

* உன் விழியால் மட்டும்

எப்படியடி ஒருசேர வீச முடிகிறது...

அன்பையும், அணுகுண்டையும்!

* மதக்கருத்துக்கு வளையாத நானும்

உன் மனக்கருத்துக்கு வளைய ஆசை...

சம்மதம் சொல்வாயா?

* விழுவது என்பதை

தோல்வி என்கிறாய்...

உன் காதலில் மட்டும்

விழுந்தால் தானடி

எனக்கு வெற்றி!

* காதல் —

பூக்கவும் வைக்கும்

உதிரவும் வைக்குமென்பதை

உன் நிராகரிப்பே எனக்கு

கற்றுக் கொடுக்கிறது!

* மன்னருக்கு அடிபணியாதவனும்

உன்னிடம் மண்டியிடும் கதை

காதல்!

* உளியின் அடி

சிலைக்கு சந்தோஷம்...

உன் விழியின் அடி

எனக்கு சந்தோஷம்!

* உன் கருப்பு வெள்ளை

விழிகளைக் கண்டதிலிருந்து

எனக்குள் வானவில் பிரவாகம்!

* அடியே...

உன் பார்வையால்

நல்லதொரு முடிவைச் சொல்...

இல்லையெனில்...

என் உயிர் போகும் வரை

அந்த பார்வையாலே கொல்!



— இளையசாகுல், முத்துப்பேட்டை.