இந்தத் தாலாட்டு!

* தூளி இல்லாமல்

தொட்டில் சேலையில்லாமல்

தூங்க வைக்கிறது

இந்தத் தாலாட்டு!

* விழித்துக் கொண்டே

உறங்க வைக்கும்

ஒரு வித்தையைச் செய்கிறது

இந்தத் தாலாட்டு!

* நடந்து கொண்டும்

உட்கார்ந்து கொண்டும்

படுத்துக் கொண்டும்

ரசிக்க வைக்கிறது

இந்தத் தாலாட்டு!

* உத்திரத்தில்

பொம்மை இல்லை

ஒய்யார பூக்களில்லை

அப்படியும் அசத்துகிறது

இந்தத் தாலாட்டு!

* செல்லாக் காசுகளையும்

மெல்லக் கிடத்தி

மன்னராக்கி விடுகிறது

இந்தத் தாலாட்டு!

* மன்னர்களைக் கூட சில சமயம்

மண்ணைக் கவ்வ வைத்து விடுகிறது

இந்தத் தாலாட்டு!

* அன்னையர் பொதுவாக

ஏற்பதுமில்லை

இசைப்பதுமில்லை

இந்தத் தாலாட்டு!

* அடுத்தவர்கள் அதரங்களால்

அர்ச்சிக்கப்படுவதே

இந்தத் தாலாட்டு!

* பகல் தூக்கத்திற்காகவே

பாடப்படுகிறது

இந்தத் தாலாட்டு!

* இதில்-

பகடையாக்கப்படுவது

களைப்பு அல்ல

பலபேரின் பிழைப்பு!

* உறக்கத்திற்கு ஒரு தாலாட்டு என்றால்

மயக்கத்திற்காகவே இந்தத் தாலாட்டு...

இதற்கு-

புகழ் என்று மற்றொரு பெயரும் உண்டு!

— வே.சின்னத்தம்பி, திருச்சி.