புயலை புரட்டுவோம்!

நீரில் மிதந்தது சென்னை

கண்ணீரில் தவித்தாள்

நமை காத்த அன்னை!

சோகங்கள் ஆயிரம்

இழப்புகள் ஆயிரம்

நம்புங்கள்...

துணிவு கொண்டால்

ஈடு செய்ய முடியாத இழப்பு

என்று எதுவுமில்லை

எதையும் ஈடு செய்யலாம்

சென்னையை மீட்கலாம்!

பாதிக்கப்பட்டோரை விட

உதவும் எண்ணம் கொண்டோர் அதிகம்

உதவும் நெஞ்சங்கள்

நமை மீட்கும்!

இயற்கை கொடுத்த

வலிகள் அதிகம்

பாடங்களோ அதை விட அதிகம்

மதங்களுக்குள்

மாட்டிக் கொண்ட மனிதம்

ஜாதிகளுக்குள் சிக்கிக்கொண்ட

சகோதரத்துவம்

பணத்துக்குள் மரித்து போன

சமத்துவம் மீட்கப்பட்டது!

அன்னிய தேசமாயிருந்த

அண்டை வீடு

நம் சொந்த வீடானது

சமூக வலைதளங்கள்

சமூக எழுச்சி கொண்டன

ஊடகங்கள் உயிர் பெற்றன...

இளைய சமுதாயம்

இமயம் போல் எழுந்தன...

இந்த நிகழ்வே

நமக்கு கிடைத்த யானை பலம்!

நீர், நிலம், காற்று

மாசுபடுவதை தடுப்பது

அரசின் கடமை என்று

அலட்சியம் கொண்டோம் - இனி

இது நம் கடமை என்று உணர்வோம்!

நாம் போட்ட குப்பைகளே

மலையாய், நாற்றமாய்...

மக்காத பிளாஸ்டிக்

பைகளை தவிர்த்து

மஞ்சள் பைகளையே பயன்படுத்தி

மங்களமாய் வாழ்வோம்

நீரின் பாதைக்கு வழிவிட்டு

இல்லம் அமைத்து

இனிதாய் வாழ்வோம்!

இன்று இழந்தவைகள்

நாம் பிறப்பில் கொண்டு வந்ததல்ல

இறுதியில் வரப்போவதும் இல்லை

வருத்தம் வேண்டாம்...

இழந்தவைகளை மீட்க

இதை விட இன்னும் அதிகமாய்

உழைக்க தன்னம்பிக்கை

கொள்வோம்!

எத்தனை முறை அறுந்தாலும்

வலை பின்ன சலிப்பதில்லை சிலந்தி

இயற்கை பேரிடரால்

தொய்வு வேண்டாம் - இன்னும்

உற்சாகமாய் உழைப்போம்!

அணு குண்டால் அமிழ்ந்து போன

ஜப்பானே மீண்டு எழும் போது

நமக்கென்ன!

கருணை உள்ளமும்

உதவும் கரங்களும்

இறைவனின் வெளிப்பாடே...

பெரும் வெள்ளத்தில்

நம் உயிர் காத்த இறைவன்

பெரிய பலத்தை தருவான்

புதிய பாதையை காட்டுவான்!

எல்லா சக்திகளும் நமக்குள்ளே

எல்லா சிந்தனைகளும் நமக்குள்ளே

எல்லா செயல்களும் நமக்குள்ளே

சோர்ந்தது போதும்

புயலையே புரட்டிப் போட

பெரும் புயலாய் எழுவோம்

மீண்டு வருவோம்!

— ஜெ. அரவிந்த் குமார்,

சென்னை.