ஒளியும், ஒலியும்....

அடுத்தவர் நலன்

பேணாத

பேனருக்கு வைத்திட்டோம்

புஸ்வானம்!

கைநாட்டும் ஒரு கவுரவம்;

கையூட்டு, 'நீட்' தேர்வுக்கு

கைகூப்பி கும்பிடு போட்டு விட்டு

கொளுத்திட்டோம்

பென்சில் மத்தாப்பு!

கசக்கிப் பிழிந்த, 'கஜா' புயலை

போர்க்கால அடிப்படையில்

கண் காணாமல் ஓட வைத்திட்டு

களிப்புற்றோம்

கண்ணிவெடி வெடித்து!

ஜனங்களோடு ஜனங்களாக

சந்தோஷமாக

சாலை பணியாளர்களும்...

துள்ளலுடன்

தரணியின் தர உயர்வுக்கு உழைத்த

திருப்தியில் திளைத்த

துப்புரவு தொழிலாளர்களும்...

விகற்பமில்லாமல்

வெற்றி முகமாய்

விவசாய பெருமக்களும்!

ஒரு கோடி

சர வெடிகளால்

ஒலியும் ஒளியும் நிரப்பி

பிரகாசமாக வந்து விட்டதால்

கொண்டாடி தீர்க்கலாம்

இனி

எப்போதும்

தீபாவளியை!

சு. பிரபாகர், தேவகோட்டை.