பாராட்டுங்கள்!

நடை தவழும் குழந்தையை

நயமாய் பாராட்டுங்கள் - அதன்

நடை வேகம் அதிகரிக்கும்!

கற்பவனின் கற்றலை

கனிவாக பாராட்டுங்கள் - அவன்

கற்கும் வேகம் இரு மடங்காகும்!

கலைஞனின் கலைத்திறனை

கண்ணியமாய் பாராட்டுங்கள் - அவன்

படைப்பாற்றல் பன்மடங்காகும்!

உழைப்பவனின் உடல் உழைப்பை

உயர்வாய் பாராட்டுங்கள் - அவன்

உடல் வலிமை கூடி விடும்!

உறவுகளின் உன்னதத்தை

உண்மையாய் பாராட்டுங்கள் - அவர்களின்

அன்பும், அக்கறையும் அதிகரிக்கும்!

வெட்டியானின் வேலையை

வெட்கமின்றி பாராட்டுங்கள் - அவர் தம்

வேதனைகள் தீர்ந்து விடும்!

எதிராளியின் ஏற்றத்தை

எகத்தாளமில்லாமல் பாராட்டுங்கள் - அவன்

எண்ணத்தில் மாற்றம் வரும்!

உங்களை நீங்களே

உயர்வாய் பாராட்டுங்கள் - உங்கள்

உத்வேகம் எழுச்சி பெறும்!

பாராட்டுங்கள்...

மனமார்ந்த பாராட்டு,

பெறுபவனுக்கு உந்துகோல்!

எஸ்.ஆர். சாந்தி, மதுரை.