பயன்படாத பிரம்மாஸ்திரம்!

* என்

பிரம்மாஸ்திரங்களில்

என்ன குறை?

எதனால் என்னால்

வெற்றி பெற முடியவில்லை!

* அவமானங்களை மட்டுமே

அள்ளித் தருகிறதே

அஸ்திரங்கள்...

பிரயோகிப்பதில் குறையா?

இல்லை அவை

பெருமை மிக்கவை இல்லையா?

* எதிரிகள் மீது

வைத்த அஸ்திரங்களை விட

அவர்களால்

தைத்த அஸ்திரங்களே

அதிகமாய் தெரிகின்றன!

* எனக்கு நிகழ்வது

என்றேனும்

உங்களுக்கும் நிகழ்ந்ததுண்டா?

எதிரி எழுச்சி பெற

நீங்கள் -

நிலைகுலைந்து போனது

நிகழ்ந்திருக்கிறதா?

* அப்படியானால் —

என்னை போலத்தான் நீங்களும்!

* எதிரிகளையும் வீழ்த்த

அன்பு, பரிவு

ஈகை, இரக்கம்

மன்னிப்பு, மனிதநேயம்

இப்படி -

ஆயிரம் அஸ்திரங்கள் இருக்கையில்

அனாயசமாக

கோபக் கணைகளால்

குறி பார்த்தது ஏன்?

* அதனால் —

நண்பர்களுமல்லவா

எதிரிகளாயினர்!

* கோபம் —

பிரம்மாஸ்திரமல்ல..

பிரயோகிக்கக் கூடாத

பிழையான அஸ்திரம்!

காரணம் —

வாழ்க்கை போர்க்களமல்ல

நீயா, நானா பார்ப்பதற்கு!

* நிலையற்றது என்பதை

நிறுவும்

சத்திரம்!

இதில் —

அஸ்திரமெடுத்து அழிந்து

போவானேன்?

சேர்ந்து களித்து

சிரித்து போகலாமே!

— ஆர்.கோகுலன், பொள்ளாச்சி.