கவிதை - மூடிய கைகளுக்குள் மூல மந்திரம் - 1,250 ரூபாய் சன்மானம்!
கவிதை - மூடிய கைகளுக்குள் மூல மந்திரம் - 1,250 ரூபாய் சன்மானம்!
PUBLISHED ON : ஜூலை 18, 2010

மூடிய கைகளுக்குள் மூல மந்திரம்
* மனமுடைந்து போகையில்
துக்கங்களைப் பகிர
துணையில்லையே என
துடித்துப் போகலாம்!
* எல்லாருக்குமா
உடன்பிறப்புகள்
ஓடிவந்து உதவுகின்றனர்?
* பல பேரின் பாதையில்
குடும்பத்தின் நிழலே
குழி பறிக்கலாம்!
* வறுமை-
வழி மறிப்பதும்,
வசதி வாய்ப்புகள்
கதவடைப்பதும்
காலங்காலமாய் நிகழ்பவைதானே?
* உறவுகள் நம்பாத போதும்,
நட்பு
பரிகசிக்கும் போதும்
பாதுகாக்கத் துணை வருவது எது?
* கலங்குகிற போதெல்லாம்
கண்ணுக்குத் தெரியாது -
கை கொடுத்துத் தூக்கும்
அந்தக் கை யாருடையது?
* நமக்குள்
நாற்றாய் இறங்கி
நங்கூரமாய்
ஆட்டம் தடுக்கிறதே
அது எது?
* ஆண்டவன் யாரையும்
தனிமரமாய்ப் படைத்துத்
தவிக்க வைப்பதில்லை!
* தடைகளை வெல்லும்
தகுதியாக,
போராடும் உறுதியைத் தான்,
ஜனிக்கிற குழந்தையின்
இறுக மூடிய இரண்டு கைகளுக்குள்
துணையாகத்
திணித்து வைத்து அனுப்புகிறது
வாழ்க்கை!
- ஆர்.அம்பிகா, நெல்லை.
