PUBLISHED ON : ஏப் 18, 2021

இந்திய மக்களின் உயிரோடும் உறவோடும் கலந்து விட்டவர், ராமபிரான். அவரது பிறந்த நாளே, ராம நவமி.
சுப நிகழ்ச்சிகளுக்காக எவரும், நவமி திதியை தேர்வு செய்வதில்லை. ஆனால், ராமபிரான் தன் பிறந்தநாளுக்காக, நவமி திதியை தேர்ந்தெடுத்தார்.
எது நமக்கு வேண்டாம் என, கருதுகிறோமோ, அதை கடவுள் ஏற்றுக் கொள்கிறார் என்பதற்கு, இது உதாரணம்.
அவரது நாமமான, ராம என்பதை, மூன்று முறை உச்சரித்தால், ஆயிரம் முறை உச்சரித்த பலன் நமக்கு கிடைக்கும். அந்த மந்திரம் தான், ஸ்ரீ ராம ராம ராமேதி ரமே ராமே மனோரமே சகஸ்ரநாமதத்துல்யம் ராம நாம வரானனே...
இந்த மந்திரத்தின் பொருளை தெரிந்து கொள்ளுங்கள்.
ராம எனும் பெயரை, மனதார தியானிப்பதில், நான் மிகவும் மகிழ்ச்சி அடைகிறேன். இந்த மந்திரத்தை சொல்வது மூலம், விஷ்ணுவின் ஆயிரம் பெயர்களை சொன்ன பலனை அடைகிறேன்.
அதாவது, இந்த மந்திரத்தை சொல்வதன் மூலம், விஷ்ணு சகஸ்ர நாமத்தை கூறிய பலனை அடைகிறோம். சகஸ்ரநாமம் என்றால், ஆயிரம் பெயர்கள்.
ராம நாமத்தின் மகிமையை விளக்க, ஒரு சம்பவத்தை எடுத்துக் காட்டலாம்.
ராம பட்டாபிஷேகத்தில் கலந்து கொண்டார், நாரத முனிவர்; கலகக்காரர். ராம நாமத்தின் மகிமையை உலகறியச் செய்ய, ஒரு தந்திரம் செய்தார். இதற்காக, அனுமனை வம்புக்கு இழுத்தார்.
'அனுமானே... நீ அனைத்து முனிவர்களிடமும் ஆசி பெறு. ஆனால், விஸ்வாமித்திரரின் காலில் மட்டும் விழாதே...' என்றார்.
அனுமனுக்கு ஆச்சரியம் தாங்கவில்லை. இருந்தாலும், நாரதர் சொன்னபடி செய்தார். இதை பெரிதாக எடுத்துக் கொள்ளவில்லை, விஸ்வாமித்திரர்.
இதுதான் சமயமென, விஸ்வாமித்திரரிடம் சென்று, 'பார்த்தீர்களா, இந்த அனுமனின் திமிரை... நீங்கள் எவ்வளவு பெரிய தபஸ்வி. உங்களை அவன் மதிக்கவில்லை...' என்றார், நாரதர்.
இதைப்பார்த்த ராமபிரான், முனிவரை மதிக்காத அனுமன் மீது, அம்பு எய்து கொல்ல உத்தரவிட்டார்.
சற்றும் கவலைப்படாமல், 'ராம... ராம...' என்று, உச்சரித்தபடி நின்றார், அனுமன்.
எல்லா அம்புகளும் கீழே விழுந்தன. அனுமன் மீது, சிறு கீறல் கூட விழவில்லை.
உடனே, 'ராம நாமத்தின் மகிமையை அனுமன் மூலம் உலகுக்கு தெரியப்படுத்தவே, இப்படி ஒரு நாடகம் ஆடினேன்...' என்றார், நாரதர்.
ராமநவமியான, ஏப்., 21 அன்று, நீங்களும் ராம நாமம் சொல்லுங்கள். உயிருக்கு ஆபத்தான காலத்தில், இந்த நாமம் நம்மை பாதுகாக்கும்.
ஸ்ரீ ராம ஜெயம்.
தி. செல்லப்பா
