பெங்களூரு திருவள்ளுவர் சங்கத் தலைவர் எஸ்.டி.குமார். டி. முனுசாமி, ஆஞ்சநேயன், விட்டல் குமார் பங்கேற்றனர். வள்ளலாரின் சத்ய ஞான சபை, சத்ய தரும சாலை உள்ளடக்கிய பெருவெளி பகுதியை, புனித பூமியாக அறிவிக்க வேண்டும் என்று தமிழக அரசுக்கு ஏற்கனவே, எஸ்.டி.குமார் வேண்டுகோள் விடுத்திருந்தார்.

இது தொடர்பாக, வடலுாரில் உள்ள பல்வேறு வள்ளலார் அமைப்பினர், வள்ளலார் தெய்வ நிலைய அறங்காவலர் குழு தலைவர் அன்பழகன் உட்பட அறங்காவலர் குழு உறுப்பினர்கள், பல்வேறு அமைப்பினருடன் ஆலோசித்தார்.

இதன் பின், எஸ்.டி.குமார் கூறுகையில், ''வள்ளலாரின் பெருவெளி பகுதியை புனித பூமியாக அறிவிக்க வேண்டும். மருதுார், கருங்குழி, மேட்டுக்குப்பம் ஆகிய மூன்று பகுதிகளையும் பாதுகாப்பு பகுதியாக அறிவிக்க வேண்டும் என்று ஏற்கனவே தமிழக முதல்வருக்கு கடிதங்கள் அனுப்பி உள்ளோம். இது தொடர்பாக, எங்கள் கோரிக்கையை முதல்வர் நிறைவேற்றுவார் என்று நம்புகிறோம்,'' என்றார்

வடலுார் சன்மார்க்க அமைப்பின் சாது ஹரி, அன்பர் சந்தோஷ், சன்மார்க்க முருக வேல், தமிழ்ச்செல்வன் ஆகியோர் உடனிருந்தனர்.

- நமது நிருபர் -