தட்சிண கன்னடா மாவட்டம் மங்களூரு நகரின் அருகில் கட்டிபல்லா எனற இடத்தில் மங்களூர் ரீபைனரி மற்றும் பெட்ரோ கெமிக்கல் லிமிடெட் என்ற பொதுத்துறை நிறுவனம் உள்ளது.

இந்த தொழிற்சாலையில் நேற்று முன்தினம் மதியம் இங்குள்ள சி.எச்.டி., எனும், ஹைட்ரோ சல்பர் பிரிவில் வெடிவிபத்து ஏற்பட்டு, தீப்பற்றியது. இதில், மணிஷ் கர்கரே என்பவர் உயிரிழந்தார். எட்டு பேர் தீக்காயங்களுடன் மருத்துவமனையில் சிகிச்சை பெற்று வருகின்றனர்.

இந்நிலையில், தொழிற்சாலையில் பணியாற்றும் ஊழியர்கள் சங்கத்தினர், நேற்று காலை தொழிற்சாலைக்கு எதிராக, தொழிற்சாலை நுழைவு வாயில் முன் போராட்டம் நடத்தினர்.

தகவல் அறிந்த எம்.எல்.ஏ., உமாநாத் கோட்டியன், சம்பவ இடத்துக்கு வந்தார். தொழிலாளர்களுடனும், தொழற்சாலை நிர்வாகிகளுடனும் பேச்சு நடத்தினார்.

பின், உமாநாத் கோட்டியன் கூறியதாவது:

தொழிலாளர்களுக்கு நீதி கிடைக்க இவ்விஷயத்தில் தலையிட்டேன். நிறுவன நிர்வாக இயக்குநருடன் பேச்சு நடத்தினேன். இதில், விபத்தில் உயிரிழந்தவரின் குடும்பத்திற்கு 90 லட்சம ரூபாய் வழங்கப்படும் என நிர்வாக இயக்குனர் தெளிவுபடுத்தி உள்ளார்.

ஒப்பந்த ஊழியர்கள் உட்பட அனைத்து பணியாளர்களின் குடும்பத்திற்கும், 15 நாட்களுக்குள் 10 லட்சம் ரூபாய்க்கான மருத்துவ காப்பீடு தொகை வழங்குவதாகவும் உறுதி அளித்துள்ளார்.

இவ்வாறு அவர் கூறினார்.