பொதுவாக ஹோட்டல்களில், வாடிக்கையாளர்கள் உணவருந்திய பின், பில் தொகையுடன் சர்வர்களுக்கு டிப்ஸ் கொடுப்பது வழக்கம். இது, அவர்களுக்கு உபரி வருவாயாக இருக்கும். இதற்காகவே வாடிக்கையாளர்களை நல்ல முறையில் பலர் கவனிப்பர்.

பெங்களூரின் ஹென்னுார் பிரதான சாலையில், கபே ஒன்று உள்ளது. இங்குள்ள ஊழியர்கள், டிப்ஸ் கொடுக்கும் வாடிக்கையாளர்களை ஊக்கப்படுத்தும் வகையில், புது வழியை கையாள்கின்றனர். அதாவது, வாடிக்கையாளர்கள் உணவருந்திய பின் டிப்ஸ் கொடுத்தால், அவர்களின் முன்னால் ஊழியர்கள் நடனமாடுகின்றனர். இது, வாடிக்கையாளர்களை மகிழ்விக்கிறது.

அந்த, 'கபே'யின் கேஷ் கவுன்டர் அருகே சிறிய போர்டு வைக்கப்பட்டுள்ளது. அதில், 'நீங்கள் டிப்ஸ் கொடுத்தால், உங்களுக்காக ஊழியர்கள் நடனமாடுவர்' என, எழுதப்பட்டுள்ளது.

இதை கண்ட பலரும், டிப்ஸ் கொடுத்து ஊழியர்களின் நடனத்தை கண்டு ரசித்து செல்கின்றனர். ஊழியர்கள் நடனமாகும் வீடியோவை, வாடிக்கையாளர்கள் மொபைல் போனில் பதிவு செய்து, சமூக வலைதளங்களிலும் வெளியிட்டு வருகின்றனர்.