நீனாசம் சதீஷ் நடிக்கும், 'தி ரைஸ் ஆப் அசோகா' திரைப்படத்தின் படப்பிடிப்பு மும்முரமாக நடக்கிறது. இதில் அவர் மிரட்டலான தோற்றத்தில் தென்படுகிறார். அவருக்கு ஜோடியாக சப்தமி கவுடா நடிக்கிறார். இவரது கதாபாத்திரம் அடங்கிய போஸ்டரை, படக்குழுவினர் வெளியிட்டுள்ளனர். இவர் அம்பிகா என்ற கிராமத்து பெண்ணாக நடிக்கிறார். தற்போது இறுதி கட்டத்தை எட்டியுள்ளது. நஞ்சன்கூடு, ஸ்ரீரங்கபட்டணா, சென்னப்பட்டணா, சாம்ராஜ்நகர், தொட்டபல்லாபூர், குண்டுலுபேட் சுற்றுப்பகுதிகளில் படப்பிடிப்பு நடத்தப்பட்டுள்ளது. படத்தில் நவீன தொழில்நுட்பத்தை அதிக அளவில் பயன்படுத்தியுள்ளனர். கன்னடத்துடன், மற்ற மொழிகளிலும் திரையிட படக்குழுவினர் திட்டமிட்டுள்ளனர்.

* ஏழு பேர்

'மெஜஸ்டிக் - 2' திரைப்படத்தின் பாடல் ஒன்று, சமீபத்தில் வெளியானது. வினு மனசு இசை அமைத்த பாடலை, ஏழு பேர் பாடியுள்ளனர். ராமு கதை, திரைக்கதை எழுதி இயக்கியுள்ளார். பரத்குமாருக்கு ஜோடியாக, சம்ஹிதா ஜோடியாக நடித்துள்ளார். கடந்த 20 ஆண்டுகளாக, ராமு திரையுலகில் இருக்கிறார். தான் எழுதிய கதைக்கு தயாரிப்பாளர் கிடைக்காமல், பல ஆண்டுகளாக காத்திருந்தார். தற்போது ஆனந்தப்பா என்ற தயாரிப்பாளர் முதலீடு செய்ய முன் வந்தார். அதன்பின் பட வேலைகளை துவக்கின. மெஜஸ்டிக்கில் பிறந்து, வளர்ந்த இளைஞனின் கதை. மெஜஸ்டிக் சுரங்கப்பாதை, பஸ் நிலையத்தில் படப்பிடிப்பு நடத்தப்பட்டது. மூத்த நடிகை ஸ்ருதி, நாயகனின் தாய் கதாபாத்திரத்தில் நடித்துள்ளார்.

* திரில்லிங் கதை

நாகராஜ் இயக்கும், 'அவளே காஞ்சனா' திரைப்படத்தின் டிரெய்லர் சில நாட்களுக்கு முன் வெளியானது. இது ஹரர், திரில்லிங் கதை கொண்டது. புதுமுக நடிகர் ஜனார்த்தன் நாயகனாக அறிமுகம் ஆகியுள்ளார். இவருக்கு ஜோடியாக பிரியா நாகண்ணா நடித்துள்ளார். மாண்டியா, மைசூரு, பன்னுார் உட்பட பல்வேறு இடங்களில் படப்பிடிப்பு நடந்துள்ளது. கிராமத்தில் இரண்டு குடும்பங்களுக்கு இடையே மனஸ்தாபம் இருக்கும். இவர்கள் குடும்பத்தை சேர்ந்த ஆணும், பெண்ணும் காதலிக்கின்றனர். இதற்கு பலத்த எதிர்ப்பு கிளம்புகிறது. அதன்பின் என்னென்ன திருப்பங்கள் ஏற்படுகின்றன என்பதை, சுவாரசியமாக கூறியுள்ளனர்.

* மீண்டும் ஒரு ரவுண்ட்

நடிகர் யஷ் நடிப்பில், சர்வதேச அளவில் பேசப்பட்ட கே.ஜி.எப்., திரைப்படம், பல கலைஞர்கள், துணை நடிகர்கள், தொழில் நுட்ப கலைஞர்களுக்கு வாழ்வளித்தது. பட வாய்ப்புகளை பெற்றுத்தந்தது. அதில் நடிகை ஸ்ரீநிதி ஷெட்டியும் ஒருவராவார். 'கே.ஜி.எப்.,' படத்துக்கு பின், இவருக்கு வேறு மொழிகளில் ஒன்றன் பின் ஒன்றாக, பட வாய்ப்புகள் குவிகின்றன. ஒன்றிரண்டு படங்கள் பெட்டிக்குள் சுருண்டாலும், அவருக்கு வாய்ப்பு குறையவில்லை. மூன்று ஆண்டுகளுக்கு பின், மீண்டும் கன்னடத்துக்கு வந்துள்ளார். 'கிச்சா 47' என்ற திரைப்படத்தில் இவரே நாயகி. இந்த படம் வெளியான பின், கன்னடத்தில் ஒரு ரவுண்ட் வருவேன் என, ஸ்ரீநிதி நம்புகிறார்.

* குட்டை கவுன்

நடிகர் சந்தன் ஷெட்டி, நடிகை நிவேதிதா கவுடா தம்பதி திருமணமான சில மாதங்களிலேயே, மன விரிசல் ஏற்பட்டு பிரிந்துள்ளனர்; விவாகரத்துக்கும் தயாராகின்றனர். இவர்கள் இணைந்து நடித்த, 'முத்து ராட்சசி' திரைப்படம் விரைவில் திரைக்கு வரவுள்ளது. இதற்கிடையே நிவேதிதா கவுடா, குட்டையான கவுன் அணிந்து, நடனமாடும் வீடியோவை சோஷியல் மீடியாவில் வெளியிட்டுள்ளார். சிலர் வீடியோவை ரசித்து பாராட்டுகின்றனர். ஆனால் சிலர் முகத்தை சுழிக்கின்றனர். விமர்சித்து கமென்ட் போட்டுள்ளனர். இதை பற்றி அவர் கவலைப்படவில்லை. எப்போதும் பெண்களை விமர்சிக்கின்றனர். இந்த சமுதாயம் மாறவே மாறாது. எப்படியோ கமென்ட் செய்யட்டும். எனக்கு வருத்தம் இல்லை என, அலட்சியமாக கூறுகிறார்.

* மாறுபட்ட கெட் - அப்

நடிகர் யுவா ராஜ்குமார் நடிக்கும், 'எக்கா' படப்பிடிப்பில் பிஸியாக இருக்கிறார். இது அவரது இரண்டாவது படமாகும். படத்தின் முதல் பாடல், சமீபத்தில் யு டியூபில் வெளியிடப்பட்டது. இப்பாடல் யுவா ராஜ்குமாரை மையமாக கொண்டுள்ளது. நாகார்ஜுனா ஷர்மா எழுதி, சரண்ராஜ் இசையமைத்த பாடலை இயக்குனர் ரோஹித் பதகி, மஹாலிங்க் பாடியுள்ளனர். ஆக்ஷன், திரில்லர் கதை கொண்ட 'எக்கா' திரைப்படம், ஜூன் 6ம் தேதி மாநிலம் முழுதும் திரையிடப்படுகிறது. சஞ்சனா ஆனந்த், சம்பதா முக்கியமான கதாபாத்திரங்களில் நடிக்கின்றனர். படத்தில் யுவா ராஜ்குமார், மாறுபட்ட கெட் - அப்பில் தோன்றுகிறார்.